Bıylǵy jyldy shahar basshysy qalamyzdaǵy qazynaly qarıalardy qoldaý jyly dep jarıalaǵany belgili. Sanaly ómirin jas urpaqty tárbıeleý men elimizdiń ekono­mıkasyn damytýǵa arnaǵan qadir­mendi qarıalarymyz mundaı qur­metke ábden laıyqty. Onyń ústine balalyǵyn soǵys urlaǵan arda­gerlerdiń de qatary sırep qalǵany jasyryn emes. Sondyqtan qashanda berekeli istiń bastaýy bolatyn Almaty aqsaqaldaryn ardaqtap, qarıalaryn qurmetteýdi bastap ta ketken edi.

Sondaı bir tamasha kesh qalamyzdaǵy «MırSHyn» meıramhanasynda ótip, merekege Jetisý, Medeý, Túrksib aýdan­darynyń qarıalary shaqyryldy. «Adam ómirge kelgende bir bala, qartaıǵanda bir bala» degen sózdiń mánine endi-endi boılaǵandaımyz. Ózderin qurmettep shaqyrǵanǵa úlken kisiler rızashylyqpen, baladaı qýanyp, qaýqyldasyp qaldy. Qalanyń ár túkpirinde turyp jatqandyq­tan bir-birin tanı bermesi anyq. Qarıalar osynaý sátti qur jibermeı tanysyp, bilisip, jón surasyp jatty. Meıram­hananyń ekinshi qabatyna kóterilgen qarıalar aq dastarhan basyna otyryp, dámnen alyp, konserttik baǵdarlamaǵa den qoıdy.

Alǵashqy quttyqtaýdy Qazaqstan halqy Assambleıasy tóraǵasynyń oryn­basary Qazbek Mamsurov alyp, shahar­daǵy júrgizilip jatqan barlyq jumystar týraly keńinen áńgimeledi. Osynaý ıgilikti istiń bastaýy Elbasymyz Nursultan Ábishulynyń ustanyp otyrǵan saıasaty ekendigine toqtaldy. Kelesi kezekte «qazaqtyń sandýǵash úndi Saýyǵy» atanǵan eńbek ardageri Saýyq Jaqanova barsha qala qarıalaryna degen qurmetin jetkizdi.

– Men barshańyzdy Jeńis merekesimen quttyqtaımyn. Óıtkeni, meniń ákem de qan maıdanǵa baryp, bir qolynan aıyrylyp kelgen edi. Uly Jeńisti toılap, soǵys bitip, saýyq-saıran bastalǵan 1945 jyly dúnıege kelgen ekenmin. Sondyqtan maǵan Saýyq degen at bergen edi. Árbir Jeńis kúni meniń de ómirimdegi erekshe kún, – dedi.

Osylaısha qarıalar ózderiniń Saýyq­tyń únin saǵynyp qalǵandaryn aıtyp, izińdi basar shákirtteriń kóp bolsyn desip jatty. Almaty qalasy ákiminiń «Qoǵamdyq kelisim» komýnaldyq memlekettik mekemesiniń dırektory Jannat Murynova qazynaǵa aınalǵan qarıalardyń bir sáttegi qýanyshynyń ózi jan jadyratatynyn aıtyp, búkil ómir­lerin eńbekke arnaǵan jandarǵa qandaı qurmettiń de jarasym­dylyǵyn áńgimeledi.

– Osy oraıda men ata men ananyń tárbıesin kórgen, úlkendi qurmet tuta biletin Qýanysh pen Jupar Qurmashevtar týraly aıtqym kelip tur. Atalary soǵysqa attanyp, Otanyn qorǵasa, mine búgin urpaqtary «Óli rıza bolmaı, tiri baıy­maıdy» degen qaǵıdany ustanyp, sizderge osyndaı qurmet kórsetip jatyr, – dedi Jannat Sharaphanqyzy.

Merekeli keshtiń kórkin Medeý aýdanynyń ardagerlerinen quralǵan hor ujymy «Zeınetkerler» degen ánmen kirgizdi. Qalamyzdaǵy etnomádenı birles­tikterdiń kórkemónerpazdar ujymy da bul kúni óz ónerlerin ortaǵa saldy. Ónerpazdar Bazarbek Qabyl, Jansaıa Ótelgenova, Álıa Qadyr ásem ánnen shashý shaqty. Mereke sońynda kásipkerler Qýanysh pen Jupar sóz sóılep, ózderiniń júrekjardy lebizderin bildirdi. Qarıalardy qur qaıtarmaı bir-bir dorba azyq-túlik syıǵa tartty.

Qala ómirindegi barlyq is-sharalarǵa belsene atsalysyp otyrǵan «Qoǵamdyq kelisim» men qaıyrymdy kásipkerler birlese otyryp 86 ardagerdiń úıine azyq-túlik jetkizip berdi.