Bıylǵy mektep bitirýshi túlekter arasynda 14–18 mamyr aralyǵynda Almaty qalasy ákimdiginiń qol­daýymen, Bilim basqarmasynyń uıymdastyrýymen muǵalim mamandyǵyn tańdaǵan úmitkerlerge Qasyl Qatyqbaeva atyndaǵy grantty utyp alýǵa arnalǵan baıqaý ótedi.

Dál qazir bizdiń qoǵamda muǵalim mamandyǵynyń mártebesin kóterýge baǵyttalǵan bastamalar júzege asyp jatyr. Muǵalim mártebesi týraly «Nur Otan» partıasy da bastama kóterip, Májilis depýtattary qoldaý bildirip jatqany belgili. Jalpy, muǵalimniń mártebesin kóterip, mereıin arttyrý úshin barlyq ıgilikti ister qolǵa alynyp, júzege asyp jatyr. Osy rette elimizdiń órken­deýine zor úlesin qosyp júrgen «Koktem group» kompanıasynyń basshysy, qalalyq máslıhat depýtaty Murat Ádilhanuly taǵy da bir táýekelge baryp, úlken saýapty isti qolǵa alyp otyr.

Halqyna adal qyzmet etip júrgen azamat eldiń erteńi, onyń jarqyn bolashaǵy búgingi jas urpaqtyń qolynda ekendigin tereń túsinip, sol óskeleń urpaqtyń taǵdyry ustazdardyń qolynda ekendigine asa mán bere otyryp, muǵalim bolam degen túlekterge qoldaý kórsetýdi de óz moınyna alyp otyr. Sonymen, Almaty qalasyndaǵy bilim oshaqtarynyń 11-synybyn bitirip, tek muǵalim mamandyǵyn tańdaǵan túlekter úsh kezeń boıynsha baǵyn synaıtyn bolady. Alǵashqy kezeńde úmitkerler oqý saýattylyǵy men matematıkadan test tapsyrsa, ekinshi kezeń boıynsha «Men tańdaǵan mamandyq» dep atalatyn esse jazady.  «Qazaqstannyń damýyna qosatyn meniń úlesim» dep atalatyn úshinshi  kezeńde óz oılaryn ortaǵa salatyn bolady.

Jobany qorǵaý úshin 5 mınýt ýaqyt beriledi. Baıqaýǵa qatysýshylarǵa oqý saýattylyǵynan 20 suraq, matematıkadan 20 suraq qoıylady. Aqtyq kezeńge 35 jáne odan joǵary bal alǵandar ótedi. Baıqaýdyń Bas júldesin jeńip alǵan túlekke Abaı atyndaǵy Qazaq ulttyq pedagogıkalyq ýnıversıtetinde oqý úshin Qatyl Qasyqbaeva atyndaǵy grant tabys etiledi. Birinshi oryn 500 000 teńge, ekinshi oryn 300 000 teńge jáne úshinshi oryn 200 000 teńge. Barlyq baıqaýǵa qatysýshylarǵa sertıfıkattar tabys etiletin bolady.