Alǵash ret Ortalyq Azıada Qyzyl Kres pen Qyzyl Jarty aı Qoǵamdarynyń H Evropalyq kon­ferensıasy ótýde. Almatydaǵy 54 eldiń delegattary qatysqan mereı­li  forýmdy ótkizýge ıspan­dyq Madrıd qalasy da úmitker bolatyn. Biraq qyzmeti adam­gershilik pen qaıyrymdylyqtan quralǵan bul qoǵamnyń alqaly jıynyn ótkizý Almatyǵa buıyrdy.

Halyqaralyq konferensıany Al­maty  qalasynyń ákimi Baýyrjan Baıbek ashyp, Memleket basshysynyń quttyqtaý  sózin  oqyp berdi.  Onda  Elbasy uıym­nyń  dúnıe júzi boıynsha oryn alyp otyrǵan  ótkir   máselelerdi  sheshýdegi, áskerı shıelenister men tabıǵı apattar kezinde zardap shekkenderge der kezinde kómek kórsetýdegi jedel qyzmetterin aıyryqsha atap ótken.

«Qazaqstan Qyzyl Kres pen Qyzyl Jarty aı qozǵalysyna onyń tolyq quqyly qatysýshysy  retinde orasan kómek  kórsetýde. Búgingi kúni BUU Qaýipsizdik  Keńesiniń turaqty emes  múshesi, sonymen qatar Astana prosesiniń bastaýshysy retinde elimiz barynsha jetilgen, qaýipsiz jáne turaqty  beıbit­shilikti ornyqtyrýǵa yqpal etýde. Tek  ózara senimge, qurmetke jáne túsinistikke negizdelgen is-qımyl ǵana barsha adamzatty basty maqsatqa jeteleıdi. Konferensıa qorytyndysy boıynsha qabyldanatyn  Almaty deklara­sıasy­nyń gýmanıtarlyq daǵdarystardy jeńý­diń jáne  kómek pen qoldaýǵa zárý jandardyń ómirin jaqsartýdyń tıimdi joldaryn izdestirýge  mańyzdy úles qosatynyna senimdimin», – delingen   Mem­leket basshysynyń quttyqtaý sózinde.

Konferensıa barysynda Baýyrjan Baıbek  oqıǵaly týrızmdi  damyta otyryp, Almatynyń  iskerlik kelissózder men halyqaralyq bıznes-kezdesýlerdiń bas qosý alańyna aınalyp otyrǵanyn  atap ótti. Tek  bıyldyń ózinde mega­polıs­te EYDU-nyń «Eýrazıa aptalyǵy», TMD elderi  úkimet basshylarynyń qatysýy­men sıfrlandyrý Forýmy ótti. Al kúzde birqatar aıtýly  halyqaralyq sharalar, sonyń ishinde Dúnıejúzilik densaýlyq saqtaý uıymynyń Almaty deklarasıa­synyń 40 jyldyǵyna jáne Eýropadaǵy «Salaýatty qalalar» jelisiniń 30 jyldy­ǵyna arnalǵan konferensıalar ótpek.

«Elimiz Táýelsizdik alǵannan bastap Elbasy Nursultan Nazarbaevtyń basshy­lyǵymen kópetnosty Qazaqstan halqy beıbitshilik pen turaqtylyqty jáne qarqyndy ekonomıkalyq damýdy tańdady. Búgingi tańda Qazaqstan – Taýly Qarabah pen Tájikstannan bastap Iran men Sırıaǵa deıingi túıtkildi máseleler men daýly kıkiljińderdi sheshý máselesinde medıator retinde tanylǵan eýrazıalyq birden-bir memleket. Sońǵy jyldardyń ózinde Islam konferensıasy men Eýro­padaǵy qaýipsizdik jáne yntymaq­tastyq uıymdaryna tabysty tóraǵa­lyq etti. Biz osy kúzde Birikken Ulttar Uıymymen birlese otyryp, Óńirlik hab ashatyn bolamyz. Alǵashqy kezeńde munda 20-ǵa jýyq halyqaralyq uıymdar men agent­tikter jumys isteıdi dep kútilýde», – dedi Baýyrjan Baıbek óz sózinde.

Óz kezeginde Qyzyl Kres pen Qyzyl Jarty aı Halyqralyq Federasıasynyń  prezıdenti  Franchesko Rokka  Almaty deklarasıasynyń  aldaǵy tórt jylda  uıym úshin  basshylyqqa alatyn basty qujattardyń birine aınalatynyn aıtty. Sońǵy ret mundaı deklarasıa  2014 jyly  ıtalándyq  Florensıada qabyldanǵan edi.

«17 mıllıonnan astam eriktilerdiń jumysy  arqasynda biz álemdegi  iri  gýmanıtarlyq júıe bolyp tabylamyz. Degenmen, bizdiń bastamalarymyzdyń jemisti bolýy jergilikti jerlerdegi jumys pen onyń sapasyna tikeleı qatysty. Bizdiń uıymnyń jumysyn  joǵary baǵalaǵan Qazaqstanǵa erekshe alǵys bildiremiz», – dep qorytyndylady sózin Franchesko Rokka.  Konferensıa óz jumysyn jalǵas­tyrýda. Onyń jumys qorytyndysy boıynsha «Almaty úndeýi» deklarasıasy  qabyldanbaq.