Mamyr merekesi qarsańynda Almaty qalasy Óńirlik komýnıkasıalar qyzmeti alańynda bıylǵy birinshi toqsanda atqarylǵan jumystarǵa oraı ótken brıfıńke QR Memlekettik qyzmet isteri jáne sybaılas jemqorlyqqa qarsy is-qımyl agenttigi Almaty qalasy boıynsha departamentiniń basshysy Aıgúl Baıhanova jáne agenttiktiń Sybaılas jemqorlyqqa qarsy ulttyq búrosy Almaty qalasy departamentiniń basshysy Erjan Ybraıymov, QR Prezıdenti janyndaǵy Memlekettik basqarý akademıasy Almaty qalalyq fılıalynyń dırek­tory Dana Jantemirova jáne qalalyq «Sanaly urpaq – jarqyn bolashaq» jobalyq keńsesiniń jetekshisi Qaıyrjan Toqyshev qatysyp, árqaısysy  óz salalarynda atqarylǵan jumystar týraly jan-jaqty aıtyp berdi.

Áýeli departament basshysy Aıgúl Beıbitbaıqyzynyń aıtýynsha, bıylǵy birinshi toqsanda ótken testileý synaq­taryna barlyǵy 2189 úmitker qatysyp, olardyń ishinde 8-i belgilengen erejeni buzý jaǵdaıy tirkelgen. Soǵan oraı, testileýdiń ashyqtyǵy men aıqyndyǵy jaıly 1989 adamǵa túrli taqyryptaǵy áleýmettik saýalnamalar júrgizilip, suraý salynǵandardyń 91 paıyzy ózderiniń testileýge qanaǵattanǵanyn bildirgen.

Sóıtip, 2018 jyldyń alǵashqy toqsa­nynda jergilikti memlekettik organ­dardaǵy bos laýazymdyq oryndarǵa 197 konkýrs jarıalanǵan eken. Olardy ótkizýdiń ashyqtyǵyn qamtamasyz etý maqsatynda túrli  qoǵamdyq uıymdardyń 71 ókilinen (qoǵamdyq qorlar, úkimettik emes uıymdar, etnomádenı birlestikter jáne t.b.) baıqaýshylar pýly qurylypty. Baıqaý­shylardyń tizimi barlyq memle­kettik organdarǵa jiberilgen.

«Al endi sybaılas jemqorlyqqa qarsy mádenıetti qalyptastyrý maqsa­tynda qalada 1017 aqparattyq-túsindir­melik is-shara – (2017 jyldyń 1-toqsa­nymen (72) salystyrǵanda 14 ese artqan) onyń ishinde, 729 – saǵat sybaılas jemqorlyqqa qarsy, 201 – onlaın konferensıa, 22 – dóńgelek ústel, 39 – semınar keńes, 20 – sybaılas jemqor­lyqqa qarsy mobıldi toptyń 193 myń 435 turǵyndy qamtyǵan eńbektik ujymdarǵa shyǵýy uıymdastyrylǵan. Nátıjesinde 500-den asa adamǵa keńes berilgen.

Sondaı-aq, osy turǵyda áleýmettik sybaılas jemqorlyqqa qarsy bir beınerolık, tanymal ártisterdiń qatys­ýymen 2 vaın jasalyp, 80-nen asa áleýmettik suhbattasýlar túsirilgen. Odan bólek, 10 túrli broshúra 10 myń dana kólemde jurt arasyna taratylǵan. Sonymen qatar, halyq kóp jınalatyn oryndarǵa 5 myńnan asa sybaılas jem­qorlyqqa qarsy plakattar ilingen jáne qala boıynsha  42 banner men 40 LED-ekrandar ornalastyrylǵan. Sosyn qazir qaladaǵy iri saýda oıyn-saýyq ortalyq­tarynda, metropolıtende, baǵyttyq avtobýstarda, kınoteatrlarda osy turǵyda rolıkter kórsetilimi júrip jatyr», – dedi, Aıgúl Baıhanova.

Al Sybaılas jemqorlyqqa qarsy ulttyq búronyń Almaty qalasy boıynsha departamenti basshysy Erjan Kebekuly «Sońǵy úsh jylda elimizde halyqaralyq reıtıńter boıynsha turaqty progres pen jemqorlyqqa qarsy is-qımyldyń oń dınamıkasy baıqaldy. Mysaly, Qazaqstan Sybaılas jemqorlyqty qabyldaýdyń Transpe­rensı Interneshnl ındeksi boıynsha 140 orynnan 122 orynǵa kóterilip, óz ju­mysyn 18 ustanymǵa deıin jaqsartty. Degenmen, bıylǵy jyldyń tek 3 aıynda bizdiń departa­mentpen qana 46 qylmystyq is tirkelip úlgerdi. Bul rette tirkelgen qylmystar boıynsha jasalǵan taldaýdyń sybaılas jemqorlyq derekteri  ishki ister organ­dary (14 is nemese 30,4 paıyz), jer­gilikti atqarý organdar (7 is – 15,2 paıyz) jáne memlekettik kirister komıtetiniń qury­lymdyq bólimderinde (4 is – 8,7 paıyz) jıi kezdesetinin kórsetti», – dep atap ótti.

Sonyń nátıjesinde sybaılas jem­qorlyq quqyqbuzýshylyq jasaǵany úshin 25 adam qylmystyq jaýap­kershilikke tartylǵan. «Atap ótetini,   Jemqorlyq quqyqbuzýshylyq jasaǵan laýazymdy tulǵalar mártebesi men dárejesine qaramastan qatań jaýapkershilikke tartylady. Óıtkeni, zań aldynda bárimiz de teńbiz!», – dep eskertip ótti Sybaılas jemqorlyqqa qarsy Ulttyq búronyń qalalyq departamenti basshysy.