Alataý aýdanynda mektep oqýshylary arasynda halqymyzdyń injý-marjany, dástúrli ónerge qoldaý kórsetilip, kóne óner tórge ozdy. Dál búgingi dańǵaza, tars-turs mýzyka sahnany jaýlaǵan tusta dástúrli ónerimizge nasıhat kerek-aq. Olaı deıtin sebebimiz, onsyz da jylt etkenge qyzyǵyp, áý degendi án dep qabyldaıtyn jastarǵa durys baǵyt berip, ulttyq ónerge bet burǵyzbasaq kúni erteń bul kúnimizge zar bolmasymyzǵa kim kepil?

Sondyqtan qazaǵy qalyń, ulttyq dás­túrdi qadirleı biletin Alataý aýdany kópke úlgi bolatyndaı saýapty isti qolǵa alyp otyr. «Nur Otan» partıasy Alataý aýdan­dyq fılıaly «Dastur» jobasy aıasynda dástúrli án oryndaýshylar baı­qaýyn ót­kizip, oǵan 12 mekteptiń úmitker­leri qatys­qan edi. Halyq ániniń kere­mettigi osynda bolsa kerek. Úmitker­lerdiń biri dombyramen ándi áýeletse, endi biri orkestrdiń súıe­meldeýimen shalqyta saldy. Osylaısha Shyryn Zeınýllaeva basshylyq etip otyrǵan №149 bilim shańyraǵan ásem áýen kernep, ulttyq rýh  qalyqtady.

Quramynda «Almaty aqshamy» gaze­tiniń Bas redaktory, qalalyq más­lıhat depýtaty Qalı Sársenbaı, dástúrli ánshi Alma Amanjolova bar ádilqazylar alqasyna jeńimpazdy anyqtaý ońaıǵa soqqan joq.

– Dál qazirgideı kezeńde ulttyq ónerge qoldaý aýadaı qajet. Sondyqtan saf ónerdi jastar arasynda nasıhat­tap, osyn­daı baıqaýlar ótkizip otyrsaq dástúrli ónerdiń tamyryna qan júgirer edi. Búgingi mektep oqýshylary erteńgi elimizdiń úmitin aqtar bolashaqtary. Ánge, ónerge degen qyzyǵý­shylyqtaryna rıza bolyp otyrmyn, – degen Qalı Qosh­qar­uly bul baıqaýdyń úrdiske aınalatynyn jetkizdi. Belgili qalamger óz atynan mektepke 50 kitap syıǵa tartty.

– Dástúrli ónerdi dáripteıik. Oraza aıynda ádilqazy bolý da ońaı emes. Barlyq ónerdi qurmettegen balany jeńimpaz dep aıtar edim, – deıdi Alma Amanjolova.

Sonymen, «júzden júırik, myńnan tulpar» shyqqan baıqaý jeńimpazdarynyń esimderi de belgili boldy. Birinshi oryndy №180 mekteptiń 10-synyp oqýshysy Sultan Shadat Kenen Ázirbaevtyń «Basta óleń» ánimen jeńip alsa, ekinshi orynǵa №154 mekteptiń 6-synyp oqýshysy Absamat Syrym «Jorǵataı» ánimen laıyq dep tanyldy. Baıqaýdyń úshinshi orny №179 mekteptiń 10-synyp oqýshysy «Sáýlem-aı» ánin oryndaǵan Gúlsezim Qarymsaqovaǵa buıyrdy.

Barlyq jeńimpazdarǵa baǵaly syı­lyqtar tabys etildi. Qorytyndy sóz sóılegen «Nur Otan» partıasy Alataý aýdandyq fılıaly tóraǵasynyń birinshi orynbasary M.Almasaev jobanyń mańyz­dylyǵyn aıta kele, dástúrli ónerge qurmet áli de jalǵasatynyn jetkizdi.