Jambyl atyndaǵy Qazaq memlekettik fılarmonıasynda Reseıdiń eńbek sińirgen ártisi, Tatarstannyń halyq ártisi Ahmed Agadı men QR eńbek sińirgen qaıratkeri, Abaı atyndaǵy Qazaq memlekettik akademıalyq opera jáne balet teatrynyń solısi Gúlzat Dáýirbaevanyń «Óz elim» atty konserttik keshi ótti. Sazdy keshte sahnanyń sánin kirgizgen belgili ánshiler N.Tilendıev atyndaǵy memlekettik akademıalyq fólklorly-etnografıalyq «Otyrar sazy» orkestriniń súıemeldeýimen óner kórsetti. Orkestrge QR eńbek sińirgen qaıratkeri Dinzýhra Tilendıeva men dırıjer, QR eńbek sińirgen qaıratkeri Músilim Ámze jetekshilik etti. Konsertte ánshiler qazaqtyń halyq ánderimen qatar, qazaqstandyq jáne sheteldik kompozıtorlardyń jurtshylyqtyń júregine jol tapqan mýzykalyq shyǵarmalaryn tyńdarmanǵa tartý etti.
– Bul konsert «Rýhanı jańǵyrý» baǵdarlamasy aıasynda ótti. N.Tilendıev atyndaǵy memlekettik akademıalyq fólklorly-etnografıalyq «Otyrar sazy» orkestri álemge áıgili ánshilermen birge óner kórsetip, konsert uıymdastyrýdy josparlap júrgen bolatyn. Osy oıymyzdy júzege asyrý maqsatynda dúnıe júzine belgili sahnalarda ataqty dırıjerlarmen óner kórsetip júrgen opera ánshisi Ahmed Agadımen birge konsert ótkizýdi jón kórdik. Ónerde bıik shyńdardy baǵyndyrǵan, talantymen talaıdy tamsandyrǵan tanymal ánshi qasıetti qazaq topyraǵynda týyp-ósken daryn ıesi. Álemdik sahnalarda óner kórsetip júrgen juldyzdarmen shyǵarmashylyq baılanysta bolý orkestrimiz úshin úlken qýanysh, – dedi QR eńbek sińirgen qaıratkeri Músilim Ámze.
Sazdy keshtiń qadirli qonaǵy bolǵan opera ánshisi Ahmed Agadı – Marıın teatrynyń jáne Tatarstannyń Musa Jálıl atyndaǵy memlekettik opera jáne balet teatrynyń solısi, Tatarstan memlekettik syılyǵynyń laýreaty. 2008 jyly «Aqyn mahabbaty» spektaklindegi Ǵabdolla Toqaı beınesi úshin «Zolotaıa maska» Ulttyq teatr syılyǵynyń «Operadaǵy úzdik keıipker» júldesin jeńip alǵan. Álemniń áıgili sahnalarynda án shyrqap júrgen opera ánshisi qazaq sahnasynda óner kórsetýdi armandaǵanyn aıtty. – Bul meniń qazaq sahnasynda alǵash ret óner kórsetýim emes. Osydan birneshe jyl buryn Astana men Almatynyń opera teatrlarynda óner kórsetken edim. Men negizi Shymkent oblysy, Alǵabas aýdany, Jylandy aýylynda dúnıege keldim. Esimdi bilgen sátten bastap qazaq tilinde sóıledim. Qazaq mektebinde bilim aldym. 37 jyldan beri dúnıejúzilik sahnalarda óner kórsetip júrsem de qazaq tilin umytqan joqpyn. Aǵaıyn-týysqandarym, jaqyn dostarym Shymkentte turatyndyqtan, jyl saıyn jazda Shym qalaǵa barýǵa asyǵamyn. Shartarapty sharlap júrseń de, kindik qanyń tamǵan týǵan jerińdi báribir saǵynady ekensiń. Qazaq sahnasynda óner kórsetýdi armandaǵan edim. Qazaqstanda týylǵandyqtan, qazaqtyń halyq ánderin aıtqym keldi. Týǵan jerimniń kıeli sahnasynda óner kórsetý men úshin úlken baqyt! – dedi Tatarstannyń halyq ártisi Ahmed Agadı.
Pikir qaldyrý