M.Áýezov atyndaǵy akademıalyq drama teatrynda Qazaqstan Jazýshylar odaǵynyń uıymdastyrýymen jáne akademıalyq drama teatrynyń qoldaýymen Halyqaralyq «Alash» ádebı syılyǵynyń ıegeri, aqyn ári jýrnalıs Jaras Sársektiń 50 jasqa tolǵan mereıtoıyna baılanysty «Janyńda júrmin…» atty shyǵarmashylyq keshi bolyp ótti.
Óleń órnegi, tirshilik aýany, ómir derekterinen qurylǵan syr-suhbattan turatyn mádenı shara naǵyz poezıa keshine ulasty. Qazaqstan Jazýshylar odaǵy basqarmasynyń tóraǵasy Ulyqbek Esdáýlet mereıtoı ıesin qazaq qalamgerleri atynan quttyqtap, ıyǵyna shapan japty. Sondaı-aq, Mádenıet jáne sport mınıstri Arystanbek Muhamedıulynyń quttyqtaýyn respýblıkalyq Kitap palatasynyń dırektory, jazýshy Álibek Asqarov, Aqparat jáne kommýnıkasıalar mınıstri Dáýren Abaevtyń quttyqtaýyn «Qazaq gazetteri» JSHS dırektorynyń orynbasary Lázzat Noǵaıbaeva, Almaty oblysynyń ákimi Amandyq Batalovtyń quttyqtaýyn oblystyq Mádenıet jáne tilderdi damytý basqarmasynyń basshysy Aqan Ábdýáli, Almaty qalasynyń ákimi Baýyrjan Baıbektiń quttyqtaýyn ákimniń keńesshisi Mamaı Ahet tabys etti. Shyǵarmashylyq ádebı keshte Jaras Sársektiń óleńderine jazylǵan ánderdi elimizdiń tanymal ánshileri oryndap, Ǵ.Músirepov atyndaǵy balalar men jasóspirimder teatrynyń ártisteri óleńderin oqydy. Aqyn týraly áriptes zamandastary men dostary Qýandyq Túmenbaı, Ábýbákir Qaıran, Baqyt Bedelhan, Baýyrjan Babajanuly, Beıbit Sarybaı, Janarbek Áshimjan, ózge de qalamgerler estelik áńgimeler aıtyp, arnaý óleńderin oqydy.
Jaras Sársek – 1968 jyly 15 mamyrda Uıǵyr aýdany, Súmbe aýylynda dúnıege kelgen. QazMÝ-di bitirgen soń «Parasat» jýrnalynda, «Jetisý» gazetinde, Qazaqstan Jazýshylar odaǵynda ádebı keńesshi bolyp qyzmet etti. «Kerýen kóship barady», «Júregimniń ishindegi júregim», ózge de óleńder jınaǵynyń avtory.
Pikir qaldyrý