Táýelsiz Qazaqstanda ulttyq sportty damytý qolǵa alynyp, birqatar Halyqaralyq federasıalar qurylǵan. Solardyń biregeıi – Qazaq kúresi. Búginde Qazaq kúresinen Álem, Azıa, halyqaralyq birinshilikteri ótkizilip turady. Eldegi Qazaq kúresi dodalarynyń bedeli men júlde qory boıynsha bıik shyńy – «Qazaqstan Barysy» týrnıri.
QR Prezıdenti júldesi úshin ótetin dástúrli dodaǵa eldiń aýdan, oblys, qalalarynda irikteý jarystary ótedi.
Shahar basshysy B.Baıbek federasıa prezıdenti bolyp tabylatyn Almatyda da jyl saıyn «Almaty Barysy» týrnıri ótkizilip, segiz aýdannyń jeńimpazdary kilemge shyǵady.
Qazaq kúresinen bıylǵy «Almaty Barysy – 2018» týrnıri Balýan Sholaq atyndaǵy sport saraıynda 1 mamyrda ótti.
Boz kilemde Almatynyń 8 aýdanynan kelgen 24 balýan ózara baq synasty.
Aıtýly dodanyń saltanatty ashylý rásiminde Almaty qalasy Deneshynyqtyrý jáne sport basqarmasynyń basshysy Ábil Dóńbaev qatysýshylarǵa sáttilik pen jarqyn jeńis tiledi.
– Elbasy Nursultan Nazarbaev «Bolashaqqa baǵdar: rýhanı jańǵyrý» atty Qazaqstan halqyna arnaǵan maqalasynda «Jańa turpatty jańǵyrýdyń eń basty sharty – ulttyq kodyńdy saqtaı bilý» degen bolatyn. Osy qaǵıdany berik ustanǵan memleketimiz ádep-ǵuryp, salt-dástúrimizdi dáriptep, ulttyq qundylyqtarymyzdy jańǵyrtý jolynda qolda bar múmkindiktiń bárin jasaý ústinde. Búginde, Qazaq kúresi elimizdegi sport túrleriniń halqymyzǵa keńinen tanymal, el súısinip tamashalaıtyn, naǵyz tekti kúres túri. Al «Almaty Barysy» týrnıri – qala turǵyndary men qonaqtaryna, jalpy sport súıer qaýymǵa tartý etilgen erekshe syı, dástúrli sporttyq mereke, – dep atap ótti.
Bıyl Túrksib aýdanynyń ókili Dáýren Nuralınov «Almaty Barysy-2018» atandy. Baıraqty básekeniń aqtyq máresinde ol Medeý aýdanynan kelgen byltyrǵy chempıon Rýslan Abdrazaqovty (132 keli) jeńdi. Jeńimpazdyń ózi 122 keli salmaqpen boz kilemge shyqqan. Fınal shyn máninde «alyptar aıqasy» boldy.
– Men týrnırdi utyp, aldaǵy «Qazaqstan Barysynda» Almaty namysyn qorǵaıtynyma qýanyshtymyn. Prezıdent júldesi – «Qazaqstan Barysynda» jeńiske umtylatyn bolamyn, – deıdi chempıon Dáýren Nuralınov.
Úshinshi oryn – Qola belbeýdi Túrksib aýdanynyń balýany Jaıdar Saılaýbaev pen Eldar Nasıev (Alataý aýdany) sarapqa saldy. Bul beldesýde jeńiske Jaıdar Saılaýbaev jetti. Ol qola belbeý men 100 myń teńgeni qanjyǵasyna baılady.
Týrnır chempıonyna «Lada prıora» kóliginiń kilti men Altyn belbeý, ekinshi oryn ıegerine 300 myń teńge kólemindegi aqshalaı syılyq pen Kúmis belbeý tabystaldy. Endi olar «Qazaqstan Barysy–2018» týrnırinde Almatynyń namysyn qorǵaıtyn bolady.
«Almaty Barysy» — Almaty qalasynyń Deneshynyqtyrý jáne sport basqarmasynyń uıymdastyrýymen ótetin dástúrge aınalǵan boz kilem dodasy. «Sporttyq Almaty» baǵdarlamasy aıasyndaǵy týrnırdiń basty maqsaty – qala turǵyndarynyń arasynda qazaq kúresin damytyp, salaýatty ómir saltyn nasıhattaý.
