M.Áýezov atyndaǵy Qazaq  memlekettik akademıalyq drama teatrynyń  mýzeıiniń qurylǵan kúni. Sondaı-aq, teatr mýzeıine mereıli 50 jyl tolyp otyr. Bul ataýly kúnge oraı M.Áýezov teatrynyń ujymy «Teatr mýzeıiniń týni» sharasyn uıymdastyrdy.

Teatr mýzeıi jarty ǵasyr ýaqyt ishinde óziniń jádigerlerin tolyqtyrýdan bólek, halyqty teatrdyń ótkenimen tanystyratyn, aıaýly da ardaqty akterlerdiń ómirnamasynyń el bile bermeıtin betterin jınaqtap, kórermenge jetkizetin aıryqsha bedelge ıe bola bildi.

Shara barysynda teatrymyzdyń akterlary qoıylymnan úzindiler keltirip, ónerlerin kórsetip, teatr mýzeıi túnin tamashalaýǵa kelgen kórermenderdi tamsandyryp, sharanyń kórkin asha tústi. Qazaqstannyń eńbek sińirgen qaıratkeri, teatrymyzdyń dırektory Asqat Maemırov pen «Mýzeı» bóliminiń jetekshisi Nargız Tamabekqyzynyń alǵy sózinen keıin kórmeni kórermederge tanystyrý bastaldy. Mýzeı kórmesiniń ekinshi bólimine alpysynshy jyldardan joǵary, táýelsizdikke deıingi kezeńdi arqaý etken dúnıeler qoıylǵan. Bul jádigerler men tarıhı sýretterdi abyz akter KSRO Halyq artısi Asanáli Áshimov ózi bastap tanystyryp, odan keıin Qazaqstannyń halyq artıseri Sábıt Orazbaev, Esmuhan Obaev jáne taǵy basqa teatrdyń aǵa býyn ókilderi jalǵastyrdy.

- Bul teatr mýzeı túnin ótkizý týraly oı bizge, Eýropa keńistiginde kóp bolamyn. Ol jaqta mýzeı túnderin ótkizý jaqsy uıymdastyrylady. Koróldik Shekspır teatrynda, Máskeýdegi M.Ermolova teatrlarynda osyndaı mádenıet bar. Eýropa teatrlarynda 200 jyl burynǵy kostúmder saqtalǵan. «Asaýǵa - tusaý» qoıylymynda ataqty Sháken Aımanov pen Hadısha Bókeevanyń qatysýymen shetelderge áıgili bolǵan elimizdiń ulttyq sahnagerleri. Teatr ónerinde mynadaı uǵym bar. Áıgili adamdardyń sahnadaǵy kostúmderiniń árqaısysynda kıe bar degen. Sol kıimdegi kıe, ónerleri darysa eken dep, biz jas akterlarlymyzǵa juǵysty bolsyn dep kıgizip jatamyz. Mysaly, teatrymyzdyń aktrısasy Gúlnur Shyńǵysovanyń kıip turǵan kostúmi ataqty KSRO halyq artısi Farıda Sharıpovanyń rolderiniń ishindegi shoqtyǵy bıik «Qara Qypshaq Qoblandy» dramasyndaǵy «Qarlyǵa» rolin somdaǵanda kıgen kostúmi. Olardyń tutynǵan rekvızıt zattary, sýretteri, tipti dápter, kúndelikterine deıin barlyǵy saqtaýly tur. Arhıvtik materıaldardy saqtaýǵa arnalǵan arnaıy bólme bar. Sondyqtanda biz maqtana alamyz. Qazaqstanda birden bir erekshe mýzeı bar ol – M.Áýezov teatrynyń mýzeıi dep. Endi bolashaqta ózimizdiń teatr mýzeıi bolyp qurylyp jatsa, nur ústine nur bolady, - deıdi teatrymyzdyń dırektory Qazaqstannyń eńbek sińirgen qaıratkeri Asqat Maemırov.

Jádigerlerdi saqtaý úshin teatrda arnaıy mýzeı mamandary qyzmet etedi. Olar jyl saıyn  gazet qıyndylaryna deıin birneshe jyldyq barlyq suqbattardy, bárin saqtaıdy. Mýzeıdegi bul kostúmder qazirgi qoıylymdarǵa qoldanylmaıdy eken. Elimizdiń tarıhyn, qazaq teatryn ashqan abyzdarymyz, teatrymyzdyń alǵashqy qarlyǵashtary osyndaı kostúmda bolǵanyn jas býynǵa kórsetip, kórnekilik quraldarymen de, dáripteı bilgendi jón sanaıdy.

Búginde  mýzeı qory Qazaqstandaǵy ózge teatrlardan kósh ilgeri, mundaǵy zattardyń san alýandyǵy, tarıhı quny asa joǵary baǵaly dúnıelerdiń moldyǵy kóńilge medeý. Sol jyldary Qapan Badyrov, Nurmuhan Jantórın, Sábıra Maıqanova, Sháken Aımanov, Hadısha Bókeeva, Sholpan Jandarbekova, Asanáli Áshimov, Esmuqan Obaev, Áýbákir Rahımov bastaǵan aǵa-apalarymyz bar kúshin salyp, jádigerlerdiń jınaqtalýyna, kóbeıýine, olardyń hronologıalyq tártippen rettelýine zor úles qosqan.

Teatr dırektory Asqat Maemırov teatr mýzeıine jádigerlerlerdi jınaqtap, kóziniń qarashyǵyndaı saqtap mýzeı jumysyna úlesin qosqany úshin Zeınesh Moldabaıqyzyna teatr ujymynyń atynan quttyqtap, alǵys hat tabys etti.

Sondaı-aq M.Áýezov teatrynda ómiriniń sońyna deıin, shırek ǵasyrdaı qyzmet etip, úlkendi-kishili qyryqtan asa rolderdi somdaǵan, óz kásibine adal, daryndy aktrısa Raýshan Áýezbaevanyń qyzy bul sharaǵa arnaıy kelip, ujymdy búgingi teatr mýzeıiniń kúnimen quttyqtap, teatr dırektory Asqat Maksımulyna estelik syılyq tabys etti.

Shara sońynda  teatr mýzeıiniń 50 jyldyǵyna arnaıy shaqyrylǵan qurmetti qonaqtar ózderiniń estelik qoltańba jazbalaryn qaldyryp, sýretke tústi.