Almaty qalasy ákimdiginiń Tilderdi damytý basqarmasynda 15 mamyr kúni "Rýhanı jańǵyrý" baǵdarlamasy aıasynda "Qazaq álipbıin latyn qarpine kóshirýdiń ózekti máseleleri" atty ǵylymı-praktıkalyq konferensıa ótkizildi. Atalmysh jıyn tilderdi damytý men qoldanýdyń 2011-2020 jyldarǵa arnalǵan memlekettik baǵdarlamasyn iske asyrý jónindegi Almaty qalasynyń 2017-2019 jyldarǵa arnalǵan is-sharalar josparyn júzege asyrý maqsatynda jáne basqarmanyń 2018 jylǵa arnalǵan jumys josparyna sáıkes uıymdastyryldy.  Konferensıaǵa qazaq álipbıin latyn grafıkasyna kóshirý jónindegi ulttyq komısıa músheleri, tilshi ǵalymdar, bilim, ǵylym mekemeleriniń mamandary, doktoranttar, magıstranttar, memlekettik organdardyń til máselesine jaýapty qyzmetkerleri, qoǵamdyq uıymdar men BAQ ókilderi qatysyp, oılaryn ortaǵa saldy. Konferensıada qazaq tiliniń dybystyq júıesi jáne qazaq dybystarynyń latyn tańbasymen tańbalanýy, jazýdyń qyzmeti jáne qazaq qoǵamynda qoldanylǵan jazý túrleri, latyn qarpine burynyraq ótken túrki halyqtarynyń tájirıbesi, latyn qarpine ótý boıynsha qurylǵan resmı jumys toptarynyń jumys týraly keńinen sóz boldy.

Konferensıany Almaty qalasy Tilderdi damytý basqarmasynyń basshysy Shımasheva Rahat Seıdahmetqyzy kirispe sóz sóılep ashty. Alǵashqy baıandamany Qazaqstan Respýblıkasy Bilim jáne ǵylym mınıstrliginiń A. Baıtursynuly atyndaǵy Til bilimi ınstıtýtynyń bas ǵylymı qyzmetkeri, fılologıa ǵylymdarynyń doktory, qazaq tili álipbıin latyn grafıkasyna kóshirý jónindegi ulttyq komısıanyń múshesi Álimhan Júnisbek jasady. Ári qaraı qazaq tili álipbıin latyn grafıkasyna kóshirý jónindegi ulttyq komısıa janyndaǵy jumys toptarynyń músheleri Zeınep Bazarbaeva, Faýzıa Orazbaeva, Baǵdan Momynova, Muhambedıa Ahmetov, Bıjomart Qapalbek, Bilál Qýanysh syndy ǵalymdar baǵdarlamada kórsetilgen retimen sóz sóılep, jumys toptarynyń aldaǵy josparlary týraly baıandady.

Konferensıanyń materıaldarymen usynylǵan baıandamalardan qurastyrylǵan «Qazaq álipbıin latyn qarpine kóshirýdiń ózekti máseleleri» atty jınaqtan tolyq tanysýǵa bolady.