Ońtústik Qazaqstan oblysynda Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda alǵash ret«Týǵan jerge taǵzym!» atty mektep bitirýshilerdiń saltanatty jıyny ótti. Atalǵan shara úsh júzdiń basyn qosqan Ordabasyda túrki tildes úsh eldiń,ıaǵnı Qazaqstan, Ózbekstan jáne Qyrǵyz Respýblıkasynyń Prezıdentteri basshylarynyń basqosqandaryna 25jyl tolýyna oraı uıymdastyrylyp otyr.

Ordabasy aýdany «Birlik» monýmenti «Ordabasy» ulttyq tarıhı-mádenı qoryǵynda ótken saltanatty sharaǵa oblys ákimi J.Túımebaev, oblystyq máslıhat hatshysy Q.Balabıev, «Nur Otan» OQOF birinshi orynbasary N.Joldasov, óńirdegi ardagerler men zıaly qaýym ókilderi, 12 Joǵarǵy oqý ornynyń basshylary, bilim salasynyń ardagerleri men ata-analar jáne mektep bitirýshi túlekter jalpy sany 1 myńnan astam adam qatysty.

Urpaqtar sabaqtastyǵyna jalǵaý bolý maqsatynda kıeli mekende ótkizilip otyrǵan jıynda sóz alǵan aımaq basshysy mektep bitirýshi túlekterge úlken ómir jolyna bastar qadamdarynyń sátti bolýyn tiledi.

«Búgingi saltanatty sharanyń Ordabasy taýynda ótkizilýi kezdeısoqtyq emes. Ordabasy taýy - qazaqtyń eldigin tanytar tusta orda bolǵan, Táýelsizdiktiń týyn jelbireter tusta kıeli tuǵyrǵa aınalǵan atameken! Ordabasy taýy - qazaq eliniń birligin nasıhattaıtyn, elimizdiń rýhyn kóteretin jáne 1726 jyly qazaq halqynyń jońǵarlar shapqynshylyǵy kezinde halyqty jumyldyrý maqsatynda úsh júzdiń basyn qosyp, eldi qorǵaýǵa jumyldyrylǵan tarıhı oryn. Elbasynyń «Ordabasyǵa oralý – qazaqstandyq patrıotızmniń jarqyn úlgisi» dep atap ketkenindeı, Sizderdi elimizdiń naǵyz patrıottary bolady degen senimmen, urpaqtar sabaqtastyǵyna jalǵaý bolsyn degen nıetpen osy kıeli mekenge shaqyrdyq»,-dedi J.Túımebaev.

Shara barysynda aımaq basshysy mektepti úzdik bitirgen jáne respýblıkalyq olımpıadalar men baıqaýlarda óńirimizdiń namysyn abyroımen qorǵaǵan úzdik 10 oqýshyny marapattap, baǵaly syılyqtar tartý etti.

Budan bólek, qatysýshy 500 úzdik oqıtyn mektep bitirýshi túlekterge estelik syılyqtar úlestirilse, olar óz taraptarynan balabaqsha búldirshinderine «Bilim Álipbıin» tapsyrdy.

Jas urpaqtyń týǵan elge degen patrıottyq sezimin arttyryp, rýhanı sanany jańǵyrtýǵa baǵyttalǵan mektep bitirýshileriniń saltanatty sharasy konserttik baǵdarlamamen jalǵasyn taýyp, ardagerlerdiń aq batasymen qorytyndylandy.

Aıta keteıik, «Birlik» monýmenti «Ordabasy» ulttyq tarıhı-mádenı qoryǵy 1993 jyldyń 26 mamyrynda arnaıy Elbasy Nursultan Ábishuly Nazarbaevtyń qaýlysymen ashylǵan. Bıyl atalǵan qoryqtyń qurylǵanyna 25 jyl tolyp otyr.

Jalpy bıylǵy oqý jylynda óńirimizdegi 1038 mektepte 634 myńǵa jýyq oqýshy bilim aldy. Onyń ishinde, 33766 oqýshy mektepti bıyl bitiredi. Bul respýblıkada bitirýshi 147 myńnan asa oqýshynyń árbir besinshisi Ońtústik óńiriniń túlegi bolyp otyr.  Bitirýshilerdiń ishinde 1692  túlek «Altyn belgi» medaline, al 1029 oqýshy«Úzdik atestatqa» úmitker atanyp otyr. Sondaı-aq, oblysta ulttyq biryńǵaı testileýge 22606 bala ótinish bildirgen.

Anyqtama: Oblystyń bilim salasyna memleket tarapynan 18,4 mlrd. teńge qarjy bólinip 90 bilim nysandarynyń qurylysy júrgizilýde, jyl sońyna deıin sonyń 45-i paıdalanýǵa beriledi.Sonǵy úsh jylda zaman talabyna saı mektepterdiń materıaldyq-tehnıkalyq bazasy da nyǵaıdy. Jańa modıfıkasıaly fızıka, hımıa, bıologıa, robototehnıka kabınetterimen jabdyqtalyp, elektrondy oqytý júıesine qosyldy.

«Sıfrlyq Qazaqstan» baǵdarlamasyna sáıkes oblys mektepterinde oqý prosesin avtomattandyrý maqsatynda 2018 jyly oblystyq búdjetten 195 mektepke 189 ınteraktıvti panelder men 1500 dana bilim berý kontentterinen turatyn «BilimBook» noýtbýktaryn satyp alý josparlanýda.