Ońtústik Qazaqstanda «Mereıli otbasy-2018» ulttyq baıqaýynyń oblystyq kezeńiniń jeńimpazdary anyqtaldy. Mereıli otbasy atanǵan jeńimpazdardy Shámshi Qaldaıaqov atyndaǵy oblystyq fılarmonıada oblys ákiminiń orynbasary Erbol Sadyr saltanatty túrde marapattap, oblys ákiminiń dıplomy men qarjylaı syılyǵyn tabys etti. 

Sonymen úsh kezeńnen turatyn (aýdandyq, oblystyq, respýblıkalyq) baıqaýdyń oblystyq kezeńinen aýdan, qaladan 38 januıa usynylyp, onyń ishinde 30 otbasy úzdik dep tanyldy. Al osylardyń arasynan Qazyǵurt aýdanynan kelgen Muhtar Momynov pen maqtaaraldyq Saparaly Serikbaevtar januıalary mereıli otbasy atanyp, 1 000 000 teńgeden qarjylaı syılyqqa ıe boldy. Osylaısha, ońtústikqazaqstandyq eki otbasy qyrkúıek aıynda Astana qalasynda ótetin respýblıkalyq baıqaýǵa joldama aldy.

Budan bólek, «Mereıli otbasy» ulttyq baıqaýynyń oblystyq qorytyndy kezeńine qatysqan barlyq 28 otbasyǵa oblys ákimi J.Túımebaevtyń Alǵys haty men 200 000 teńge qarjylaı syılyq tabystaldy.

Elbasy jarlyǵymen bastaý alǵan «Mereıli otbasy» ulttyq konkýrsynyń maqsaty bir shańyraq astynda berekeli ómir súrýdiń mańyzdylyǵyn arttyrý, otbasylyq ómir salty, ata-analyq paryz, jaýapkershilik sekildi uǵymdardy el sanasyna sińirý, ásirese jastarǵa jetkizý, jarasymdy januıa qundylyǵyn keńinen nasıhattaý bolyp tabylady.