Elbasymyz Nursultan Nazarbaevtyń «Bolashaqqa baǵdar: rýhanı jańǵyrý» maqalasynda kóterilgen «Týǵan jer» baǵdarlamasyn iske asyrý maqsatynda týǵan elden túlep ushyp, elimizdiń basqa oblys, qalalarynda qyzmet atqaryp júrgen otyrarlyq azamattar aýylǵa degen ystyq yqylastaryn ıgilikti ispen dáleldedi.
Astana qalasynyń 20 jyldyq mereıli jyly aıasynda, qasıetti Ramazan aıynda jeke kásipker Esbol Qambarov Aqtóbe aýylynda zamanaýı talapqa saı 240 oryndyq Áýesbek Qambarov atyndaǵy sport keshenin paıdalanýǵa berdi.
Aýdan ákimdiginiń usynysyn qabyl alǵan kásipker Esbol Áýesbekuly 1 naýryz - Alǵys aıtý kúni merekesine oraı qurylys jumystaryn bastap, bolashaq sport kesheniniń qazyǵyn qaǵý rásimin ótkizgen bolatyn. Az ýaqyt ishinde boı kótergen keshenniń qurylysy tolyǵymen aıaqtalyp, aqtóbelikterdi zor qýanyshqa keneltti.
Sporttyq nysannyń ashylýyna aýdan ákimi Erlan Aıtahanov qatysyp, eldimeken turǵyndaryn quttyqtady.
«Búgin kúsh atasy Qajymuqan atamyzdyń týǵan jeri Aqtóbe aýylynda halyq ıgiligi úshin jasalǵan taǵy bir jaqsy istiń, osy eldi mekenniń balalary úshin salynyp, el ıgiligine paıdalanýǵa berilgeli jatqan ıgi bastamanyń kýási bolyp turmyz. Elbasymyzdyń «Bolashaqqa baǵdar - rýhanı jańǵyrý» baǵdarlamasynyń - Týǵan jer jobasy aıasynda aýyl jastaryna, salaýatty ómir saltyn ustaný maqsatynda jerlesimiz kásipker Esbol Qambarovtyń qoldaýymen salynǵan sport kesheni el ıgiligi úshin qaltqysyz qyzmet ete bersin.
Bolashaqta osy keshende shyńdalǵan balǵyn sportshylarymyz halyqaralyq deńgeıdegi jarystarda top jaryp, Olımp shyńyn baǵyndyratyndyǵyna senim kámil» dedi, Erlan Aıtahanov.
Aýyl turǵyndarynyń alǵysyna bólengen jany jomart azamatqa el aǵalary qurmetpen er qanaty at mingizip, ıyǵyna zerli shapan japty.
Endigi jerde aýyl turǵyndary sporttyń kúres, boks, kishi fýtbol, volleıbol, basketbol, ústel tenısi sekildi birneshe túrimen shuǵyldanyp, buqaralyq sportty damytýǵa óz úlesterin qosatyn bolady.
Sport kesheniniń ashylý rásiminen soń tyl ardageri Áýesbek Qambarulyn eske alýǵa arnalǵan volleıboldan oblystyq birinshilikpen jalǵasyn tapty.
Turǵyndar arasynda buqaralyq sportty damytý, salaýatty ómir saltyn nasıhattaý maqsatynda ótip jatqan týrnırge oblysymyzdan 10 komanda qatysyp, baqtaryn synady.
