Balalar úılerin transformasıalaý qajet. Mundaı usynysty búgin Májiliste Qazaqstannyń Bala quqyqtary jónindegi ýákili retinde atqarǵan jumysy jaıynda baıandaǵan Zaǵıpa Balıeva aıtty, dep habarlaıdy Qamshy.kz aqparat agenttigi QazAqparatqa silteme jasap.

«Balalar úılerin transformasıalaý qajet. Balalar úıin tolyqtaı jaýyp tastaýǵa bolmaıdy. Óıtkeni, ókinishke oraı balalardy tastap ketý, olardan bas tartý tyıylmaq emes. Sondyqtan da Almaty ákimdigimen balalar úılerin transformasıalaý baǵytynda jumys istep jatyrmyz», - dedi balalar ombýdsmeni.

Onyń paıymynsha, balalar úıleri daǵdarys ortalyǵy, ata-analardy daıyndaý mektebi retinde qarastyrylýy tıis.

Zaǵıpa Balıevanyń dereginshe, 7 myń jetim balanyń 80 paıyzy áleýmettik jetim bolyp tabylady.  

«Olardyń ata-analary tiri. Sondyqtan qoǵamdy bizde bar barlyq baǵdarlamaǵa qosyp, sol baǵytta jumys isteý qajet», - dedi ol.

Buǵan deıin Zaǵıpa Balıeva Aqtóbe oblysyndaǵy vıdeokonferensıada balalar úıine úkimettik emes uıymdardy jaqyndatpaý kerektigin aıtqan bolatyn.

«Men Balalar quqyǵyn qorǵaý komıtetinen taǵy da suraımyn - bir de bir balalar úıinde balalar úıi ujymynan basqa, qandaı da bir qorlar, úkimettik emes uıymdar, basqa da uıymdar bolmaýy kerek», - dep atap ótken edi  Z.Balıeva Aqtóbe oblysyndaǵy vıdeokonferensıada.