"Nur Otan" partıasy jańǵyrý aıasynda birqatar tyń bastamalardy qolǵa alǵany belgili. Solardyń qatarynda İT-synyp jáne İT-ortalyqtar ashý sıaqty elimizdi sıfrlandyrý isine qatysty jańa partıalyq jobalar bar. Búginde partıanyń tikeleı bastamasymen elimiz boıynsha 56 İT-synyp ashylyp úlgerdi. Bul týraly búgin "Nur Otan" partıasy Saıası keńesiniń keńeıtilgen otyrysynda aıtyldy.

Elbasynyń tóraǵalyǵymen ótken otyrysta «Nur Otan» partıasyn júıeli túrde jańǵyrtý jáne Qazaqstan Respýblıkasy Prezıdentiniń Bes áleýmettik bastamasynyń júzege asyrylýyn qoǵamdyq baqylaýdy uıymdastyrý máseleleri qaraldy.

Osyǵan oraı partıa Tóraǵasynyń Birinshi orynbasary Máýlen Áshimbaev partıalyq jańǵyrý aıasynda atqarylǵan jumystar jóninde esep berip, baıandama jasady. Onyń aıtýynsha, partıa elimizdegi "Sıfrly Qazaqstan", "Rýhanı jańǵyrý" baǵdarlamalaryna atsalysýǵa, shaǵyn jáne orta bıznesti damytýǵa qatysty 22 jańa jobany qolǵa alǵan.

– Aldaǵy úsh jylda elimizde tegin 1000 İT-synyp ashýdy qolǵa aldyq. Qazirdiń ózinde elimiz boıynsha 56 osyndaı synyp jumys istep tur. Jalpy bıyl 280 synyp ashý josparlanyp otyr. Osy bastamanyń aıasynda jylyna 150 myń bala baǵdarlamalaý men robot tehnıkalarynyń negizderin úırenetin bolady", – dedi partıa Tóraǵasynyń Birinshi orynbasary.

Elbasy barlyq tyń bastamalarǵa qoldaý bildirip, Úkimet pen ákimdikterge olardy tıimdi júzege asyrýǵa belsene qatysýdy tapsyrdy.

Aıta keteıik, otyrys jumysyna Saıası keńes músheleri – Úkimettiń, Parlamenttiń, Prezıdent Ákimshiliginiń basshylyǵy, Memlekettik hatshy, «Nur Otan» partıasynyń Májilistegi fraksıasynyń depýtattary, ortalyq jáne jergilikti memlekettik organdardyń basshylary, sondaı-aq beınekonferens baılanysy arqyly barlyq oblys ákimderi, oblystyq máslıhat hatshylary jáne partıa oblystyq fılıaldary tóraǵalarynyń birinshi orynbasarlary qatysty.