Reseıdegi Qazaqstan Elshiligi Tomırıs Baısafanyń isine qatysty resmı málimdeme jasady. Málimdemede oqıǵa bolǵan kúnnen bastap búginge jaǵdaı jazylǵan. Tomırıs Baısafanyń isi Elshiliktiń qatań baqylaýynda.
«13 sáýirde Máskeý memlekettik halyqaralyq qatynastar ýnıversıtetiniń 4 kýrs stýdenti Tomırıs Baısafa oqý ǵımaratynyń tórtinshi qabatynyń terezesinen qulap tústi.
Sol kúni-aq RF-daǵy QR elshiligi jedel túrde qyzdyń ata-anasyna jaǵdaıdy estirtti. Óz kezeginde, ata-anasy Máskeýge sol kúni keshke ushatyndaryn aıtty. Elshiliktiń aralasýymen qyz ǵylymı zertteý ınstıtýtyna jetkizilip, reanımasıa bólimine jatqyzyldy. Máskeý qalasy boıynsha RF Memlekettik qaýipsizdik qyzmetiniń Nıkýlın aýdan aralyq tergeý basqarmasymen úzdiksiz baılanysta boldyq. RF SİM-ge oqıǵany jan-jaqty jáne obektıvti tergeý týraly ótinishpen Elshiliktiń notasy joldandy. Konsýl qyzmetkerleri aýrýhanany kún-tún demeı kúzetýmen boldy. Ata-anasy elge jetken boıda Elshiliktiń arnaıy kóligi jiberildi», - delingen Reseıdegi Qazaqstan Elshiliginiń málimdemesinde.
14 mamyrda medısına mamandarymen kezdesý ótti. Sonymen qatar iske qatysty tergeý jumystary bastaldy. Sol kúni Elshilik ýnıversıtet basshylyǵymen kezdesti. 16 sáýirde tergeýshilermen kezdesý ótti. 20 sáýirde Tomırıs Baısafa jatqan aýrýhananyń bas dárigerimen kezdesý ótti. Memleketter arasyndaǵy kelisim aıasynda medısınalyq kómek kórsetý máselesi talqylandy. Qyzdyń anasy Janna Ahmetova Tomırıstiń jaǵdaıymen tolyq tanysqan.
3 mamyrda Tomırıs Baısafa qaıtys boldy.
4 mamyrda sot-medısınalyq saraptama júrgizildi. Sol kúni saǵat 15.00-de qyzdyń denesin Qazaqstanǵa jiberý boıynsha qujattar ázirlendi. Tomırıs Baısafanyń ata-anasyna advokat usynyldy. Advokat Elshilikpen 10 jyldan beri jumys istep keledi.
17 mamyrda tergeýshilermen kezdesý ótti, kezdesýde tergeý sharalarynyń jalǵasyp jatqany anyqtaldy.
18 mamyrda Reseı Tergeý komıteti basqarmasynyń Máskeý boıynsha basshysymen kezdesý ótti. Onda Tomırıs Baısafanyń oqý úzdigi bolǵandyǵy, jaǵdaıy jaqsy otbasynan ekendigi jáne muǵalimdermen, dostarymen, ata-anasymen jaqsy qarym-qatynastaǵy boıjetken ekeni habarlandy. Elshiliktiń aıtýnysha, qyzdyń ata-anasy bar jaǵdaıdan ýaqytyly habardar bolyp otyrady.
