Jańa mekemeniń ashylýyna óńir basshysy Altaı Kólginov, qala ákimi Murat Muqaev qatysty.

Bul elimiz boıynsha arnaıy baǵyttaǵy on besinshi ortalyq eken. Ortalyqta negizinen eki qyzmet túri kórsetiledi: avtokólikterdi tirkeý nemese qaıta tirkeýden ótkizý jáne júrgizýshi kýáligin tabystaý. Qyzmet kórsetý ortalyǵy Jáńgir han kóshesi,160 meken jaıynda ornalasqan. Jańa nysannyń aýmaǵy 2500 sharshy metrdi quraıdy.

Qala ákimi Murat Muqaevtyń aıtýynsha, shahar boıynsha 103 000 avtokólik tirkelgen.

Ortalyqta azamattardyń qujattaryn qabyldaý úshin 15 ústel bar. Sonymen qatar kólik júrgizýshilerine aıyppuldar men salyqtardy ózdiginen tóleýge múmkindik beretin «Connection point» júıesi jumys isteıdi.

- Arnaıy halyqqa qyzmet kórsetý ortalyǵynda barlyq jaǵdaı jasalǵan. Endi azamattarǵa memlekettik bajdy tóleý úshin ekinshi deńgeıli bankterge barýyna týra kelmeıdi. Bunda qujattardy rásimdeý eki saǵattaı ǵana ýaqyt alatyn bolady. Máselen, avtokólik tirkeý 90 mınýt ishinde júzege assa, 2 saǵattyń ishinde kólik júrgizýshisi kýáligin ala alasyz. Ortalyqta kólik júrgizýshisi kýáligin alý úshin teorıalyq emtıhan tapsyratyn synyp bar. Sonymen qatar kútý zaly, medısınalyq kabınetter, praktıkalyq emtıhandy tapsyrýǵa arnalǵan avtodrom da bar, - deıdi "Azamattarǵa arnalǵan úkimet" memlekettik korporasıasynyń tóraǵasy A.Ospanov.

Aıta keteıik, jyl sońyna deıin osyndaı ortalyq Atyraý qalasynda ashylady.