"QazAtomProm" AQ burynǵy basshysy Muhtar Jákishevke úshinshi toptaǵy múgedektik berildi, - dep habarlaıdy Qamshy.kz aqparat agenttigi.
Qaraǵandy oblysynyń Dolınka kentinde medısınalyq-eńbek saraptamalyq komısıasynyń kezdesýi ótip, Jákishevke múgedektiktiń úshinshi toby berildi. Advokat Nurlan Beısekeevtiń málimdeýinshe, "QazAtomPromnyń" burynǵy basshysynyń qan qysymy jıi kóterilip, densaýlyǵy nasharlaǵan.
"Men qujattardy kórgen joqpyn. Múgedektiktiń úshinshi toby qandaı dıagnozdyń negizinde berilgenin de naqty bilmeı otyrmyn. Kelesi aptada kolonıaǵa baryp máseleniń mán-jaıyn bilýge tyrysamyn", - deıdi advokat.
Qazirgi ýaqytta Muhtar Jákishev Qaraǵandy oblysynyń klımaty qolaısyz Dolınka kentinde jazasyn ótep jatyr. Advokattyń aıtýynsha, onyń jaǵdaıy kúrt nasharlaǵan.
- Densaýlyǵy nashar. Sozylmaly syrqatyna qosa qan qysymy joǵary. Jaǵdaıyna qatysty qosymsha aqparattarmen bólise almaımyn. Biraq syrqaty shynymen aýyr,-dedi advokat Nurlan Beısekeev.
Advokattyń aıtýy boıynsha, kolonıada Jákishevke turaqty túrde medısınalyq qyzmet kórsetilip jatyr. Qan qysymyn tómendetýge erekshe nazar aýdarylǵan. Qazir múgedektik berilgen soń, em sharalary burynǵydan jıileı túsken.
Qazaqstannyń ýran naryǵyndaǵy iri kásiporyn "QazAtomProm" AQ burynǵy basshysy Muhtar Jákishev 2010 jyly 14 jylǵa sottaldy.
Esterińizge salsaq, 2017 jyldyń 15 aqpanynda qazaqstandyq quqyq qorǵaýshy Baqytjan Tóreǵojına Facebook-tegi paraqshasynda prezıdent Nursultan Nazarbaevtyń atyna Muhtar Jákishevke raqymshylyq jasaý týraly jazylǵan úndeý jarıalady. Úndeýge bes myń adam qol qoıyp, 23 naýryzda hattardyń bárine Qazaqstannyń bas prokýratýrasynan «joq» degen jaýap keldi.
