Astananyń mereıtoıy "EXPO" alańynda «El júregi-Astana» atty saltanatty sharamen ashylady, dep jazady qamshy.kz. Mereıtoıdyń jalpy baǵdarlamasyn arnaıy saıttan qaraýǵa bolady.
Mádenıet jáne sport mınıstri Arystanbek Muhamedıulynyń, Astana ákimi Áset Isekeshevtiń sózderine súıensek, bas shahardyń týǵan kúnine oraılas sharalar bas-aıaǵy birneshe kúnmen nemese birer aptamen shektelip qalmaıdy. Qala halqy, shaharǵa alys-jaqyn aımaqtardan kelgen meımandar úshin uıymdastyrylatyn sharalardyń aýqymy áldeqaıda keń, tipti birneshe aıǵa deıin ulasatyn bolady. Josparlanǵan jıyndar da Astanamen shektelip qalmaıdy, Almatyda jáne basqa da iri qalalarda atap ótiledi.
Mádenıet jáne sport mınıstrligi, Astana qalalyq ákimdigi jáne basqa da memlekettik organdar muryndyq bolatyn 645 shara ótkizilýi tıis. Bulardyń qatarynda reseılik Marıa teatrynyń gastróldik sapary, halyqaralyq Kann kınofestıvali - 2018 aıasyndaǵy qazaq kınosynyń aptalyǵy, Nú-Iorkte ótetin Á.Qasteev atyndaǵy memlekettik mýzeı qoryndaǵy kartınalardyń kórmesi syndy sharalar bar. A.Muhamedıuly aıtyp ótkendeı, 15-16 maýsymda ótetin Voice of Astana estrada ánderiniń halyqaralyq festıvali de kólemdi qarajatty qajet etetin jobalardyń sanatynda. Bul mádenı jıynǵa álemdik sýperjuldyzdar shaqyrylmaǵanymen, jaryq pen dybystyń sapaly bolýynyń ózi arzanǵa túspeıdi eken. Bir atap óterligi, mýzykalyq baǵyttaǵy sharalardyń barlyǵynda otandyq mýzyka ónerin, tól kompozıtorlarymyz ben juldyzdarymyzdyń shyǵarmashylyǵyn nasıhattaýǵa basa kóńil bólinedi. «Biz bıyl festıváldiń alǵashqy kúnin «A-stýdıo» tobynyń jetekshisi Baıǵalı Serkebaevtyń 60 jyldyǵyna arnaǵymyz kelip otyr. Ekinshi kúnin Batyrhan Shúkenovti eske alýǵa arnaımyz. Valerıı Meladzeden bastap, Leonıd Agýtın, Krıstına Orbakaıte syndy tanymal óner juldyzdarynyń barlyǵy Batyrhannyń dostary retinde osy konsertke qatysýdy paryz sanaıdy», deıdi mınıstr.
Mereıtoı baǵdarlamasyna kóz júgirtsek, 1 shildedegi «Qazaqstan barysy» respýblıkalyq qazaqsha kúres týrnıri, 1-5 shilde aralyǵynda ótetin XIV halyqaralyq «Eýrazıa» festıvali, 7-13 shildedegi İ halyqaralyq Wide World teatrlar festıvali, 25-29 maýsym kúnderi ótetin The Spirit of the Dance etnostyq mýzyka men halyq bıi festıvali, halyqaralyq aqyndar aıtysy syndy aýqymdy mádenı sharalar legi tolastamaıdy eken. Wide World teatrlar festıvali aıasynda halyqaralyq sımfonıalyq orkestr súıemeldeıtin Karl Djenkınstiń Chune Astana odasynyń saltanatty premerasy, «Operalıa» festıvaliniń baǵdarlamasynda Muqan Tólebaevtyń «Birjan-Sara» operasy qoıylatynyn atap ótken lázim. Jyl saıyn maýsym aıynyń orta sheninen bastap qala kúnin toılaý qyza túsetini belgili. Bıyl merekelik sharalardyń legi, shahardaǵy merekelik kóńil-kúı birer aptanyń aıasynda saıabyrlap qalmaı, jaz boıy tolastamaýy tıis. Bul elordalyqtar úshin de, Astanaǵa jazda qydyryp keletin meımandar úshin de yńǵaıly bolary sózsiz.
Bıyl Qazaqstannyń Ulybrıtanıadaǵy, Japonıadaǵy, Qytaıdaǵy kúnderi jáne Ózbekstannyń, Ázerbaıjannyń, Reseıdiń Qazaqstandaǵy kúnderi ótedi. Astana ortalyǵyndaǵy Ulttyq akademıalyq kitaphananyń dırektory Úmithan Muńalbaeva kitap ordasy elorda mereıtoıyna arnap álemniń tanymal 20 kitaphanasynyń kórmesin ótkizetinin jetkizdi. On toǵyz memlekettiń kitaphanalarynda Qazaqstannyń ádebı jáne mádenı ortalyqtaryn ashqandaryn málimdegen ol osyndaı jıyrmasynshy ortalyq bıyl Germanıada ashylatynyn, osylardyń bári kórmege keletinin aıtty. «Byltyr Fransıanyń BULAS atty úlken kitaphanasynda Mustafa Shoqaıdyń qoljazbalaryn taptyq. Kitaphana bizge bul qoljazbalardy tapsyrýǵa daıyn», dedi Úmithan Muńalbaeva.
«Astana Balet» teatrynyń dırektory Valerıı Kúzembaevtyń aıtýynsha, bıyl atalmysh óner oshaǵy Astana mereıtoıyna «Jızel» baletimen qosa, qazaq ertegisi jelisimen qoıylatyn baletti tartý etedi. Bul týyndynyń lıbrettosyn Baqyt Qaıyrbekov jazyp jatyr. «Astana Opera» teatry dırektorynyń orynbasary Aleksandr Sovostánovtyń sózinshe, bıyl bul ujymnyń «Birjan-Sara» operasynyń premerasy ashyq aspan astynda ótedi. Kastıng jarıalanyp, qazirgi tańda bas keıipkerlerdi somdaıtyn ártister tańdalyp jatqan kórinedi. Buǵan qosa, «Qozy Kórpesh-Baıan sulý», «Sevılá shashtarazy», «Evgenıı Onegın» operalary «Korsar» baleti qoıylady. Pekınniń ulttyq opera teatrymen birge qoıylatyn «Týrandot» operasyn sahnalaýǵa álem moıyndaǵan rejıser Tımýr Bekmambetov shaqyrylyp otyr. Qazirgi tańda onymen kelissózder júrgizilýde. Uıymdastyrýshylar Astana mereıtoıyna arnalatyn aıtýly sharalarǵa bıletter tehnıkalyq sebepterge baılanysty elektrondy satylymǵa áli túspegenin aıtty.
