Astanadaǵy lıftterge qyzmet kórsetetin 69 kompanıanyń barlyǵy tekseriledi. Bul týraly qaladaǵy qurylys sapasy týraly jıyn barysynda aıtyldy, dep habarlaıdy Qamshy.kz aqparat agenttigi Astana ákimdiginiń resmı saıtyna silteme jasap. 

Astana qalasynyń ákimi Áset Isekeshevtyń aıtýy boıynsha bul salada tájirıbesi joq kompanıalardyń "erkeligine" jol berýge bolmaıdy. 

«Jyl basynan beri alty oqıǵa tirkeldi, jaqynda eki bala lıftte qysylyp qaldy. Bul problema nege azaımaıdy? Salany túgeldeı bızneske aınaldyryp jibergen. Bizde bul sala boıynsha 60-tan asa kompanıa jumys isteıdi. Bizge berilgen málimet boıynsha olardyń tek jartysynda ǵana qyzmetkerler men arnaıy jabdyqtar bar. Al qalǵan kompanıalar páter ıeleriniń kooperatıvterimen kelisim shartqa turady», - dedi Astana ákimi.

 Isekeshevtiń aıtýy boıynsha, ákimdik lıft kompanıalarynyń qyzmetin retteıtin zańǵa túzetýler daıyndady. Zań kúshine engenshe, Astanada lıft boıynsha qyzmet kórsetetin barlyq kompanıalardyń jumysy tekseriledi.

«Bul kompanıalardyń jumysyn júıeleý kerek. Barlyǵynda bilikti mamandar jumys isteýi kerek. Turǵyn úılerde shamamen 4900 lıft bar. Qazir biz tekserip jatyrmyz. Biraq tekseristi qatań túrde júrgizýge tıispiz. Prokoratýramen lıftterdiń jumysyn jiti tekserý úshin arnaıy jospary daıyndap jatyrmyz. Bul sala tájirıbesi az kompanıalardyń «erkeleıtin» orny emes. Adamdardyń qaýipsizdigi birinshi orynǵa qoıylatyn máselede tek qana biligi joǵary, sapaly qyzmet kórsetetin kompanıalar jumys isteýi kerek. Osy sebepti ákim orynbasarlaryna, basqarmalarǵa, ózge de organdarǵa qaladaǵy lıft boıynsha kompanıalardyń jumysyn baqylaýǵa alýdy tapsyramyn», - dep tapsyrma berdi Astana ákimi.

Lıftterde aqaýlar paıda bolyp, máseleler týyndaǵan jaǵdaıda PIK pen kompanıa basshylary jaýapqa tartylatyn bolady. Al is materıaldary quqyq qorǵaý organdaryna jiberiledi.

Atalmysh jıynda Áset Isekeshev barlyq PIK-ti 2018 jyldyń jeltoqsanyna deıin tekserýdi tapsyrdy.