QR Bas sanıtarıalyq dárigeri Jandarbek Bekshın menıngıt ınfeksıasy týraly Whatsapp jelisinde taralyp jatqan aqparatqa baılanysty qazaqstandyqtarǵa vıdeo úndeý joldady, dep habarlaıdy Qamshy.kz aqparat agenttigi. 

Bekshın Whatsapp jelisinde belgisiz áıeldiń balalary balabaqshaǵa baratyn ata-analardy menıngıtke qarsy antıbıotıkpen emdelýge shaqyrǵan aýdıojazbanyń tarap jatqanyn aıtady. 

Densaýlyq saqtaý mınıstrliginiń bas sanıtarıalyq dárigeriniń málimdeýinshe, bul aqparat rastalmaǵan.

"Menıngıt jaıly jelide tarap jatqan qaýesetke senbeýlerińizdi suranamyz. Tek qana mınıstrlik tarapynan aıtylǵan aqparatqa senińizder", - deıdi Bekshın.

Jandarbek Bekshınniń aıtýynsha, jyl saıyn Qazaqstanda menıngıt dıagnozymen 62-den 424-ge deıin naýqas tirkeledi.  Sonymen qatar, bul dıagnoz túri adam tyǵyz ornalasqan memleketterde de órship tur. Mysaly, 2018 jyldyń birinshi maýsymynda Reseıde - 257, Armenıada - 31,  Grýzıada - 39 adam ólimi tirkelgen. Bul menıngıt dertiniń álemde qatty órship turǵanyn bildiredi. 

"Ádette adam ólimine alyp keletin barlyq syrqat medısınalyq kómekke kesh júgingennen bolady. "Ýaqyt, al syrqat odan da jyldam asqynyp ketýi múmkin"-, dep atap ótti dáriger.

Jandarbek Bekshın medısınalyq turǵydan ruqsat etilgen profılaktıkalyq sharalardy atap berdi: múmkindiginshe adam kóp jınalǵan oryndarǵa, oıyn-saýyq, saýda-sattyq keshenderine barmaý, aýasy tar, jeldetilmeıin oryndardaǵy sharalarǵa qatyspaý, metroda, qoǵamdyq kólikte, bir ret paıdalanylatyn betperde taǵyp júrý, jatyn bólmelerdi jıi jeldetý, úıde dezınfeksıalaý quraldarymen dymqyl tazalyq jumystaryn júrgizý.

"Túshkirý jıilep, jótel paıda bolsa, tamaǵyńyz aýyrsa, qyzýyńyz kóterilse, deneńizge bórtpe shyqsa - dereý dárigerdiń kómegine júginińizder. Múmkindiginshe sýyqtamaýǵa tyrysyp,ashtyqtan, uıqysyzdyqtan, strestten saqtanyńyzdar", - dep atap ótti Jandarbek Bekshın.