Semeı shahary árqashanda balalardyń jańashyldyǵyna aıryqsha kóńil bólip, búgingi kúnniń daryndy jastaryn elge tanytý maqsatynda túrli baıqaýlar uıymdastyryp keledi. Ásirese, beıneleý ónerine qyzyǵýshylyqtary bar balaqaılar úshin kóptegen konkýrstar ótkiziledi.
Osyǵan oraı búgin qalamyzdaǵy Dostyq úıiniń aldynda Analar keńesiniń jáne de tatar etnomádenı birlestiginiń tikeleı bastamasymen Elordamyzdyń 20 jyldyǵyna oraılastyrylyp, óńirimizdegi mektep oqýshylary arasynda «Álem balalar kózimen» atty sýret baıqaýy ótti.
Baıqaýǵa qatysqan 100-ge jýyq jas sýretshiler túrli-tústi borlarmen asfáltqa ózderi qalaǵan kórinisti ádemilep sýrettep, eki saǵattyń ishinde ǵımarat aýlasyn este qalarlyqtaı qyzyqty sýrettermen toltyrdy. Sharaǵa qatysqan barlyq kishkentaı búldirshinderimizge táttiler úlestirilip, túrli oıynshyqtar syıǵa tartyldy.
Uıymdastyrýshylardyń aıtýynsha, jas jetkinshekterdiń Otanyn súıýge, týǵan jerge, tarıhı muralarǵa qurmetpen qaraýǵa tárbıeleýdi maqsat etken osyndaı qyzyqqa toly saıystar aldaǵy ýaqytta da jalǵasyn tabatyn bolady.
