Aımaq basshysy Danıal Ahmetov Reseı Federasıasynyń Qazaqstandaǵy Tótenshe jáne Ókiletti Elshisi Alekseı Borodavkın myrzany qabyldady.

Oblys ákimi kezdesý barysynda Shyǵys Qazaqstan týraly jan-jaqty aqparat berip ótti. Atap aıtsaq, óńir basshysy Qazsınk, ÚMZ, Aqtoǵaı kesheni sıaqty ólkedegi alpaýyt óndiris oryndarynyń qazirgi tynys-tirshiligi men josparlaryna toqtaldy. Álemdegi berılııdiń jáne tantaldyń 30 paıyzy bizdiń óńirde óndiriledi degen Danıal Ahmetov shıkizattan birtindep daıyn ónim shyǵarýǵa kóshý – basty maqsat ekenin qadap aıtty. Shyǵystaǵy úsh GES-tiń – Buqtyrma, Óskemen jáne Shúlbi sý elektr stansalarynyń mol múmkindikterin de atap kórsetti. Agrarlyq saladaǵy oblystyń áleýeti de aıtyldy. Jylyna 1 mıllıonnan astam tona sút óndiretin Shyǵys Qazaqstan qazirgi kezde kórshiles Qytaı naryǵyna ótýdi kózdep otyr.
Byltyr SHQO men Reseı arasyndaǵy taýar aınalymy 1 mıllıard 360 mıllıon AQSH dolllaryn quraǵan. Ázirshe, satýdan góri satyp alýymyz kóp bolyp otyr. Biraq, aldaǵy ýaqytta alys-beris, ıaǵnı ımport-eksport tepe-teńdigi ornaıdy dep kútilýde. Shyǵystyń Reseı naryǵyna ótkizer taýarlary da barshylyq.

Aımaq basshysy osy jyly taýar aınalymy 1 jarym mıllıard dollarǵa taqaıtynyn aıtyp, ózara tıimdi qarym-qatynas ornatatyn salalardyń áli de kóp ekenin tilge tıek etti.

Elshi myrza óz sózin laýazymyna kiriskenine 2 jarym aı ǵana bolǵanyn aıtýdan bastady.

– Qurmetti Danıal Kenjetaıuly, men osy qyzmetke jýyrda ǵana kiristim. Bul – meniń Qazaqstan óńirlerine jasap otyrǵan alǵashqy saparym. Ony Shyǵystan bastaýdy jón sanadym. Óıtkeni, munda bizdiń konsýldyǵymyz bar, ol qazir óte jaqsy jumys istep jatyr. Sosyn Qazaqstannyń óndiristik óńiri bolyp tabylatyn Shyǵys Qazaqstanda reseılik kompanıalardyń qatysýymen qurylǵan kásiporyndar kóptep sanalady. Aldaǵy eki-úsh kúnde oblysty aralap, jaqynyraq tanysýǵa tyrysamyn, – dedi A.Borodavkın myrza.

Jospar boıynsha,erteń elshi SHQMTÝ ujymymen kezdesip, Óskemendegi birqatar iri kásiporyndardy aralamaq.