1 maýsym — Halyqaralyq balalardy qorǵaý kúni merekesi qarsańynda «Dınamo» dene-shynyqtyrý sport qoǵamy Semeı qalalyq ishki ister basqarmasymen birigip, qaladaǵy № 8 jáne Shúlbi kenttik balalar úıiniń tárbıelenýshileri arasynda estafetalyq jarys ótkizdi.

Jarysty Semeı qalasynyń dene shynyqtyrý jáne sport bóliminiń basshysy Murat Qurjyqaev ashyp, qatysýshylarǵa sáttilik tiledi. Bıylǵy jyldy QR İshki İster Mınıstrligi «Baqytty balalyq shaqty qorǵaý» jyly dep jarıalap otyr. Mundaı sheshim qoǵamda balalarǵa qarsy jabaıy áreketterdiń oryn alýyna jol bermeý úshin qabyldanǵan.

Aldaǵy ýaqytta İshki ister mınıstrligi balalardyń quqyǵyn erekshe qorǵap, olardyń zańdy múddelerin alǵa qoımaqshy. Jasóspirimder arasyndaǵy qadaǵalaýsyzdyq pen quqyq buzýshylyqqa endi erekshe mán berilmek. İs-shara barysynda JQAJ qyzmetkerleri boks, sambo, dzúdo, qazaqsha kúresten, qoıan-qoltyq urystan, sondaı-aq qarý qoldaný tásilderinen arnaıy kórsetilim qoıdy.

Jarysqa 7 jastan 15 jas aralyǵyndaǵy 60 asa bala qatysty. 7-9 jas aralyǵyndaǵylar júldeli oryn úshin 5 komanda bolyp saıysty. Olar «Ekstrımal», «Raketa», «Alǵa», «Drýjba» jáne «Búrkit» komandalary dep ataldy. Árbir qatysýshyǵa qalalyq «Dınamo» fılıalynan dop, fýtbol kıimi, badmıntondar jáne taǵy da basqa sporttyq buıymdar tabystaldy.

Aksıa sońynda semeılik polıseıler balalarǵa balmuzdaq taratty.