28 mamyr kúni respýblıka kóleminde Nazarbaev zıatkerlik mektepteriniń uıymdastyrýymen «Qoldaıyq aýyl mektebin» atty aksıasy ótti. Shalǵaıdaǵy aýyl mektepterine materıaldyq –moraldyq kómek berýdi kózdegen aıtýly shara Zıatkerlik bilim oshaǵynyń 10 jyldyǵyna oraı qolǵa alyndy.
Osyǵan sáıkes, Semeı qalasyndaǵy fızıka-matematıka baǵytyndaǵy Nazarbaev Zıatkerlik mektebi Prırechnoe aýylyndaǵy «Prırechnoe jalpy orta bilim beretin mektebine» atbasyn burdy. Mektep dırektory Vera Tıhomolovanyń aıtýynsha, búginde aýyldaǵy bilim mekemesinde 200 –den astam bala dáris alady. Sonymen qatar mektep janynan búldirshinder úshin ashylǵan shaǵyn ortalyq jumys istep turǵan kórinedi.
Zıatkerlik mektep ujymyn mektep dırektory Baǵdan Qaıyrjanov ózi bastap baryp, aýyldaǵy ustaz áriptesteri men oqýshylarǵa respýblıka kóleminde ótkzilip jatqan aksıanyń mán-mańyzy jaıly aıta kelip, Zıatkerlik mektepterdiń búgingi tynys-tirshiligi men sońǵy jańalyqtarymen bólisti.
— Bizdiń sizderge kelýimizdiń basty maqsaty – ózimizdegi bardy sizdermen bólisý. Osy arqyly sapaly bilim men joǵary nátıjelerge, jaqsy kórsetkishterge qol jetkizý. Bıyl elimizdegi Zıatkerlik mektepterdiń qurylǵanyna 10 jyl tolady. Osy ótpeli kezeń ishinde jetken jetistikterimiz az emes. Qazaqstannyń bolashaǵy bilimdi jastar sizderde ekeninElbasymyz N.Á.Nazarbaev jıi aıtady. Endeshe, sizderdiń alańsyz bilim alýlaryńyz úshin barlyq jaǵdaılar jasalýy kerek. Búgin sizderge 100 kóshet bólme gúlderin, 300-ge jýyq túrli kórkem ádebı kitaptar, sportpen shuǵyldanýlaryń úshin 15 dop, ózderińdeı oqýshylar qolynan shyqqan 3D prınterter alyp kelip otyrmyz, -degen Baǵdan Toqtamysuly ózderi alyp kelgen syılyqtardy tabys etti.
Jalpy aksıa sheńberinde Nazarbaev Zıatkerlik mektepteri 20 aýyl mektebine Zıatkerlik mektepteriniń oqýshylary men muǵalimderi jınaǵan 6 875 dana kórkem jáne ǵylymı-tanymdyq ádebıet, oqýshylar ósirgen 2 000 kóshet bólme gúlderin, DBBU ortalyqtyry (OBO, PSHO, PÓO) jasaǵan 860 dana muǵalimderge arnalǵan ádistemelik nusqaýlar, Almaty qalasyndaǵy Nazarbaev Zıatkerlik mektepteri oqýshylary jasaǵan 20 3D prınter, 20 stend, 300 sporttyq dop syıǵa tartyldy.
Aýyl mektebine jasalǵan saparda Zıatkerlik mektep ustazdary áriptesterine arnap túrli taqyryptarda sheberlik synyptaryn ótkizse, «Kóshbasshylar keńesi» músheleri qurdastarymen birlese otyryp aktıvıtıler uıymdastyrdy.
Dál osy kúni respýblıka kólemindegi aýyl mektepteriniń ustazdaryna jańartylǵan bilim mazmuny men krıterıaldy baǵalaýdan, oqytýdyń ádisterimen tehnologıalarynan Ádistemelik konsýltasıalar uıymdastyrylady. Konsýltasıalar sheńberinde barlyq oqý pánderinen 500 astam sheberlik synyptary ótkizildi.
Jıyn sońynda Prırechnoe jalpy orta bilim beretin mektebiniń dırektory Vera Tıhomolova eki mektep arasyndaǵy tyǵyz qarym-qatynas ótken oqý jyly basynda ornatylǵanyn tilge tıek ete kelip, aksıany uıymdastarǵan Zıatkerlik mektepter basshylyǵyna, ustazdarǵa, oqýshylarǵa júrekjardy alǵysyn bildirdi. Aldaǵy ýaqytta da ekijaqty baılanys damı beretindigine senim bildirdi.
