Aýdan ortalyǵynan shalǵaıda jatqan sharýa qojalyqtaryna elektr energıasy tartylýda. «Bıznestiń jol kartasy – 2020» baǵdarlamasy aıasynda ótken jyly 16 qystaqqa jaryq baǵanalary ornatylyp, halyq qýanyp qalǵanyn aıta ketken oryndy.
Bıyl aýdandaǵy segiz kásipker elektr jelisin tartýdy josparlap otyr. Oǵan 110 mıllıon 932 myń teńge qarajat qarastyrylǵan. Resmı derek kózderine súıensek, Abaı aýdanynda 2012 jyldan beri 19 sharýa qojalyqtyń 25 qystaǵyna jaryq tartylypty. Oǵan memleket tarapynan 318 mıllıon 867 myń teńge qarajat jumsalǵan. Aýdandyq kásipkerlik jáne aýyl sharýashylyǵy bóliminiń basshysy Dýman Narımanulynyń aıtýynsha, Abaıda «Bıznestiń jol kartasy-2020» baǵdarlamasy aıasynda atqarylyp jatqan sharýa kóp.
– Kúndelikti kúıbeń tirshilikti elektr energıasynsyz kózge elestete almaıtyn boldyq. Keıde jaryq birer saǵatqa sónip qalǵanda bir-birimizge seńdeı soǵylysatynymyz aıtpasa da túsinikti ǵoı. Tipti bárimiz qoldanatyn turmystyq tehnıkalardy bylaı qoıǵanda, úıdi jylytýdy, qaqpa, esikterdi ashýǵa deıin osy qudiretti qýatqa júktep qoıdyq emes pe. Sondyqtan ata kásipten nápaqasyn taýyp otyrǵan sharýa qojalyqtaryna jaryq aýadaı qajet. Sol sebepten biz «Bıznestiń jol kartasy – 2020» baǵdarlamasy aıasynda shalǵaıda jatqan qystaqtarǵa elektr jelisin ornatýdy qolǵa aldyq. Bul sharýa qojalyqtarynyń jumysyn az bolsa da jeńildetýge múmkindik beredi,- deıdi Dýman Narımanuly.
Abaı aýdanynda «Bıznestiń jol kartasy-2020» baǵdarlamasy aıasynda elektr jelisine qol jetkizgenderdiń biri – Samal Muqataı. Ol aýdandaǵy «Aıtýǵan» sharýa qojalyǵynyń basshysy.
– Jaryq tartylǵaly beri tól alý naýqany oıdaǵydaı ótti. Áıtpese buryn maısham jaǵyp, maldy qarap otyratynbyz. Shyny kerek elektr baǵanalary ornatylǵannan bastap jumysymyz jeńildedi. Shyn qýandyq. Ras. Bul aýyly aralas, qoıy qoralas aýdan halqy úshin óte tıimdi baǵdarlama boldy. Bizdiń kásibimizdi damytýǵa qoldaý kórsetken aýdan basshylyǵyna alǵystan basqa aıtarymyz joq, — dep rızashylyǵyn bildirdi ol.
Búginde ata kásipti damytýǵa den qoıǵan abaılyq kásipkerlerdiń alǵa qoıǵan maqsattary kóp. Olar mal basyn kóbeıtip, aýdandaǵy aýyl sharýashylyǵy salasyn órkendetýge úles qospaq.
