Qalamyzdaǵy túıemoınaq aralynda Semeı mektep lıgasy pikir saıysshylarynyń dostyq qarym-qatynasyn nyǵaıtý jáne tájirıbe almasý maqsatynda dástúrli «Birligimiz jarasqan» atty mıks pikir-saıys týrnıri ashyq aspan astynda ótti.

Tartysqa toly doda «Mıks» formatynda ótkendikten, fraksıalardy tańdaý jerebe tartý arqyly anyqtaldy. Barlyq raýndtar Amerıkalyq Parlamenttik pikir-saıys formatynda(APF) oınatyldy. Qatysýshylar saıys barysynda «B.P adam armandamasa baqyttyraq bolady dep esepteıdi», «B.P Shúkirshilik etý prınsıpi qazaqtardyń basty qateligi bolyp sanalady», «B.P QR teńgesiniń dızaıynyn qoldaıdy» degen taqyryptardy talqylap, kózqarastaryn ortaǵa saldy.

Jarystyń qorytyndysyna sáıkes, Bınur Turysbekova men Adema Qadylbekova jeńis tuǵyrynyń eń bıik satysyna kóterilip, kýbokty qanjyǵalaryna baılady. Sondaı-aq oınaý stılderimen erekshelengen Aıaýly Mamytova jáne Aqbota Serıkkazınova İİ oryndy ıelense, al úzdik úshtikti 32 mekteptiń oqýshylary Ámir Ómirjanov pen Gúlden Júnisqazyqyzy qorytyndylady. Jeke spıkerler arasynda, ıaǵnı Lınkoln-Dýglas (LD) formaty boıynsha, Bınur Turysbekova «Eń úzdik spıker» nomınasıasyn jeńip aldy.