Óskemende «Qaıratty jastar-2018» atty jumysshy jastar baıqaýy ótti. Oǵan qatysýshylar án men bıden shashý shashyp, sporttan da qur alaqan emestigin kórsetti.

Mundaı formatta besinshi ret uıymdastyrylyp otyrǵan baıqaýǵa oblysymyzdyń iri kásiporyndary men zaýyttarynda eńbek etetin jumysshy jastar qatysyp, sporttyq saıystar men óner baıqaýynda baq synasty. Jalpy, baıqaýǵa oblystaǵy iri zaýyt pen kásiporynnyń komandalary qatysty. Atap aıtqanda, «Óskemen Tıtan-magnıı kombınaty», «Azıa Avto», «Úlbi metalýrgıalyq zaýyty» sıaqty óndiris oryndarynyń komandalary men bank qyzmetkerleri qatysty.

Baıqaýdyń qorytyndysy boıynsha «Úzdik shyǵarmashylyq baǵdarlama» jáne «Birligi jarasqan ujym», sondaı-aq «Jastar tańdaýy» atalymdary boıynsha «ÓskemenTıtan-magnıı kombınaty» marapattaldy. Aıta ketý kerek, «Jastar tańdaýy» atalymy áleýmettik jelidegi jastardyń daýys berýi arqyly anyqtaldy. Al «Kásiporyndaǵy úzdik jastar uıymy» atalymyna Úlbi metalýrgıalyq zaýytynyń komandasy laıyq dep tanylsa, «Úzdik jankúıer» atalymyn «Azıa Avto» kásiporny jeńip aldy. Baıqaý barysynda zamanaýı ánderdi shyrqap, kórermen qaýymnyń kóńilinen shyqqan pavlodarlyq Azamat Ýzdaev pen óskemendik Erkejan Musaeva keshtiń hanzadasy men hanshaıymy atandy. Jeńimpaz komandalarǵa qarjylaı syılyqtar tabys etildi.