Oblys ákimi Danıal Ahmetovtyń pikirinshe, óńirdegi barlyq qoǵamdyq kólikter múmkindigi shekteýli jandarǵa arnalǵan quraldarmen qajetinshe jabdyqtalýy tıis.

Búgin oblys ákimdiginde ótken jıynda SHQO Jumyspen qamtý jáne áleýmettik baǵdarlamalardy úılestirý basqarmasynyń basshysy Elena Starenkova aımaqtaǵy avtobýstardyń eshqaısysy kembaǵal jandarǵa ońtaıly qyzmet kórsetýge daıyn emestigin aıtty. Mamandardyń oıynsha, qoǵamdyq kólikterdi múgedek jandarǵa yńǵaıly etý úshin, bul máseleni tender talaptaryna engizý kerek.

-Bul másele tender talaptaryna engizilip qoıǵan. Atalǵan talap oryndalmasa qatysýshynyń upaıy tómendetiledi,-dedi SHQO Jolaýshylar tasymaly jáne avtomobıl joldary basqarmasynyń basshysy Áset Sultanov.

Alaıda, oblys ákimi Danıal Ahmetov bul talaptardyń eshqandaı nátıje bermeı jatqandyǵyn aıtty.

-Qala kóshelerine shyǵyp qarap kórińizder, múmkindigi shekteýli adamdardyń avtobýstarǵa otyrýy óte qıyn. Avtobýstardy qajetti quraldarmen qamtamasyz etý úshin  tenderdiń talaptaryn ózgertý kerek,-dedi oblys ákimi.