Bul aqyldy kóshelik shamdar qazirdiń ózinde oblys ortalyǵynyń negizgi kóshelerinde ornatylǵan.

Máselen, qazir Qazaqstan kóshesin túngi ýaqytta samaladaı jarqyratyp tur. Jaryq berýmen qatar Wi-Fi taratý, uıaly baılanys jelisin keńeıtý sekildi birneshe fýnksıany da qatar atqarady.

Ony ornatýmen aınalysqan LED Solution kompanıasynyń ókilderi aldaǵy ýaqytta da óńirde birlese jumys isteýge nıetti. Olar búginge deıin Óskemendegi bes ortalyq kóshege eki aıdyń ishinde 501 kóshe shamyn ornatqan. Kompanıa mundaı aqyldy shamdardardy oılap tapqan amerıkalyq Ubicell kompanıasymen birlese jumys isteýde.

Bularmen odan ári jumys isteý máselesi oblys ákimi Danıal Ahmetovtiń tóraǵalyǵymen ótken taraptar arasyndaǵy kezdesý barysynda jan-jaqty talqyǵa salyndy.

– Biz jaryq dıodty shamdardy shyǵarýmen aınalysamyz. Buryn sham ǵana shyǵarsaq, endi kúsh biriktirip olardyń tehnologıasyn, bylaısha aıtsaq «mıyn» qoldanyp, aqyldy shamdar shyǵaryp jatyrmyz. Bul shamdar burynǵyǵa qaraǵanda jaryqtyǵymen qosa, 65 paıyzǵa deıin únemdilik ákeledi, — dedi shamdardy tanystyrý rásiminde LED Solution kompanıasynyń dırektory Qanybek Aıtaqov.

– Eń bastysy, kompanıa básekege qabiletti ekendigin is júzinde kórsetýi tıis. Sizderdiń aıtqandaryńyz kóńilge qonymdy. Taǵy bir márte kózimdi jetkizý úshin búgin túnde qala kóshelerin taǵy bir aralap kórip shyǵamyn. Baıqaımyn, Qazaqstan kóshesi men Ortalyq meshit mańy jaryq bola túskendeı, — degen oblys ákimi kompanıa ókilderine qaıyrymdylyq kómegi retinde aldymen Ortalyq meshittiń barlyq qabyrǵalyq shamdaryn aýystyryp shyǵýdy tapsyrdy.