Qyrǵyzstanda 20 jastaǵy Býrýlaı Týrdalyqyzynyń ólimine baılanysty tergeý jumystary aıaqtaldy.

Qyrǵyzstan ishki ister mınıstriniń buıryǵymen Shý oblysy ishki ister bas basqarmasynyń basshysy Nurlan Sarchaev, onyń eki orynbasary jáne Jaıyl aýdandyq ishki ister bóliminiń basshysy qyzmetterinen bostaldy.

Jaıyl ishki ister bóliminiń tergeýshisi de qyz alyp qashý jóninde túsken aryzdy der kezinde qaramaǵandyqtan, "qyrǵyz mılısıasy qyzmetkerleriniń abyroıyn túsirdi" degen aıyppen jumysynan bosatylǵan.

Qyzmettik tergeý boıynsha ishki ister organdarynyń jalpy 23 qyzmetkeri jazaǵa tartylǵan.

Qyzmettik tergeýdiń qorytyndysy prokýratýraǵa jiberilgen. Jaıyl aýdany prokýratýrasy mılısıa qyzmetkerlerine qatysty Qylmystyq kodekstiń 316-baby ("Nemquraılylyq") boıynsha is qozǵaǵan.

27 mamyrda Shý oblysy Jaıyl ishki ister bólimi ǵımaratynda 20 jastaǵy Býrýlaı Týrdaalyqyzy qaza tapty. Mılısıa bóliminde ony alyp qashqan jigit pyshaqtap óltirgen, keıin ózin de jaralaǵan. Qazir jigit aýrýhanada jatyr.

Qyrǵyzstan prezıdenti Sooronbaı Jeenbekov premer-mınıstr Muhammedkalyı Abylǵazıevpen kezdesýinde mılısıa bóliminde mert bolǵan Býrýlaı Týrdaalyqyzynyń ólimine jol bergenderdi aıaýsyz jazalaýdy talap etken.