Otyrar aýdandyq mádenıet saraıynda ótken sharada "Qazaqstandaǵy 100 jańa esim" jobasyna engen ońtústikqazaqstandyq el maqtanyshtary arnaıy qyzyl kilemmen júrip ótip, qylqalam sheberi Á.Máliktiń sýret kórmesin tamashalady.
Otyrar aýdany ákimdiginiń uıymdastyrǵan tarıhı jıynǵa 600-ge jýyq aýdan jastary men turǵyndar qatysyp, jyly júzdesýge aıryqsha yqylastaryn bildirdi.
"Rýhanı jańǵyrý-tarıhymyzdy tereńnen tolǵap, bolashaqqa jarqyn iz salatyn aıryqsha baǵdarlama. El erteńine nyq qadam, biregeı maqsatqa baǵyttaıtyn tuǵyry bıik bastama kóptegen ilkimdi isterge jol ashty. Sonyń biri, "Qazaqstandaǵy 100 jańa esim" jobasy bolsa, el tańdaýymen qurmet bıigine kóterilgen halyq ardaqtylarynyń maqsaty men eńbegi, jetken jetistigi men adaldyq, abyroı bıigindegi qadir-qasıeti árbir jastyń sanasynda myqtap túıilýi tıis. Olardy qurmet tuta otyryp, izgi jolynan tálim-tárbıe ala bilýi kerek"-dep, tarıhtyń izgi betterinde esimderi jazylǵan el ardaqtylaryn quttyqtaǵan Otyrar aýdanynyń ákimi Aıtahanov Erlan Qýanyshuly aýdan halqy atynan arnaıy syı-sıapattar tabys etti.
Elbasy N.Á.Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynda atap kórsetilgen, jastardyń úlgi alýyna, zamanaýı Qazaqstannyń kelbetin tanytýǵa múmkindik beretin «QAZAQSTANDAǴY 100 JAŃA ESİM» jobasyna Ońtústik Qazaqstan oblysynan engen azamattar ishinde Otyrar elin sport arenasynda respýblıka men qatar alys-jaqyn shet elderge tanytyp júrgen, qazirgi tańda sambodan Azıa jáne Eýropa chempıony Quralbaı Orynbasar men elimizge aty máshhúr aıtysker aqyn Bekarys Shoıbekov te bar ekendigi belgili.
Sharaǵa atalǵan azamattarmen qatar, qazaqtyń ulttyq zıatkerlik sportynyń jaryq juldyzy, toǵyzqumalaqtan álemniń 7 dúrkin chempıony Ásel Dalıeva, jeke kásipker «Qaıyp ata» JSHS dırektory Ertaev Syrym Mahambetuly qatysty.
Kezdesý keshiniń maqsaty -Táýelsizdik dáýirinde elimizdiń kórkeıýine úles qosqan, ultymyzdyń altyn qoryna enýge laıyqty ońtústikqazaqstandyqtardy kópshilikke tanytý bolyp tabylady.
Aýdannyń mártebeli meımandaryna belgili aıtysker aqyn Dáýren Aqsaqalov arnaý aıtyp, salıqaly eńbek joldaryn sulý sózben jetkizse, aýdan ónerpazdary dástúrli án, kúmbirlegen kúı tógiltip iltıpattaryn bildirdi.
Sharaǵa qatysýshy tarıh tulǵalary ómiri men eńbek joldary jaıynda áńgimelep, saýaldarǵa jaýap berdi. Óz pikiri men suraǵyn joldaýshylar arasynda aýdan ákimi de bar. Otyrardan shyqqan jas mamandardy kásipkerlikke baýlý men ustazdyq etý, aýdanda jańa kásip ornyn ashý, sport salasyn damytýǵa qoldaý bildirý syndy birqatar saýaldaryn qonaqtarǵa halyq ortasynda turyp tótesinen qoıǵan aýdan basshysy Erlan Qýanyshulynyń bul qadamy 100 jańa esim ıelerin qaıran qaldyrdy. Qarapaıym aýdan basshysynyń kıeli aımaqty damytýǵa baǵyttalǵan maqsattary men eńbegine aıryqsha alǵysyn bildirgen jeke kásipker «Qaıyp ata» JSHS dırektory Syrym Ertaev jas mamandardy mal sharýashylyǵyna baýlı otyryp, Otyrardan jańa jumys ornyn ashýǵa kelisimin berse, ózge de qonaqtar qoldaý bildirýge nıetti ekendikterin jetkizdi.
Jıyn qaıta jańǵyrǵan «Otyrar» memlekettik arheologıalyq qoryq-mýzeıi men "Keıki batyr" fılminiń túsirilim alańyn tanystyrýǵa ulasyp, aýyzashar berildi.
