Alakól demalys aımaǵynyń ınfraqurylymyn damytýǵa úsh jylda 4,5 mıllıard teńge bólindi. Bul týraly kól jaǵalaýyndaǵy demalys bazalarynyń jazǵy maýsymǵa daıyndyǵyn teksergen oblys ákimi Danıal Ahmetov málimdedi.

Sapar barysynda aımaq basshysy jergilikti Arbat pen kól jaǵalaýyndaǵy qurylys jumystarymen tanysty. Atap aıtqanda, maýsymaralyq úzilis kezinde munda jańa oryndyqtar men gúlzarlar, alyp ALAKÓL jazýy sıaqty dúnıeler paıda bolǵan. Jerge tratýarlyq plıtalar tóselgen. Qazir Arbattyń ortalyq bóliginde sýburqaq qurylysy júrgizilýde. Bir jyldyń ishinde ájeptáýir jańalanǵan kól jaǵalaýyndaǵy qurylys jumystarynyń barysymen tanysqan oblys ákimi atqarylǵan sharýaǵa kóńili tolatynyn jetkizdi. Degenmen biraz syn da aıtyldy.

– Keıbir demalys bazalary ǵımarattarynyń syrtqy kelbetin ózgertý kerek. Bul jerdegi bazalar men meıramhanalardyń barlyǵy sáýlettik stıli jaǵynan uqsas bolýy tıis. Sonymen qatar órt qaýipsizdigi talaptary qatań saqtalýy shart, – degen oblys ákimi bıyl Alakól jaǵalaýynyń bas jospary ázirlenetinin de jetkizdi.