Keshe «Otbasy kúni» merekesine oraı elimizdegi Nazarbaev Zıatkerlik mektepterinde jalpyulttyq ata-analar jınalysy ótti.

Osyǵan baılanysty Semeı qalasyndaǵy fızıka-matematıka baǵytyndaǵy Nazarbaev Zıatkerlik mektebinde «Rýhanı jańǵyrý» qoǵamdyq sanany jańǵyrtý baǵdarlamasyn iske asyrý aıasynda «Bilimdi ult – sapaly oqytý jáne otbasylyq qundylyqtar» taqyrybynda ata-analar keńesiniń músheleri bas qosty. Jıyny 38 adam qatysqan jınalysta birneshe másele kún tártibine qoıyldy. Máselen, mektep dırektory Baǵdan Qaıyrjanov «Rýhanı jańǵyrý» baǵdarlamasynyń júzege asyrylýy — bilim berýdiń negizi», dırektordyń oqý isi jónindegi orynbasary Gúlnar Qaıyrhanova «Oqý jylynyń qorytyndysy, oqýshylardyń bilim sapasy»,al Semeı qalalyq Tilderdi oqytý ortalyǵynyń dırektory Záýresh Ramazanova bolsa qamqorshylar keńesiniń jumysy jaıly jınalǵandardy keńirek aqparattandyrdy. Budan bólek, oqý úrdisin sıfrlaý jaıly aǵa ınjener Aıbek Kerimbaev, oqýlyqtardy ázirleý týraly ınformatıka pániniń muǵalimi Zoıa Jýrbenko jan-jaqty maǵlumat berip, keleli oılaryn ortaǵa saldy.

Basqosýda sóz alǵan mektep basshysy bilim alýshy árbir oqýshynyń óz eline, jerine jany ashıtyn, eljandy azamat bolyp ósýine mektep pen ata-analardyń birlese atsalysýǵa shaqyrsa, dırektordyń tárbıe isi jónindegi orynbasary Larısa Abylqasymova synyp saǵattary, «Shańyraq» saǵattary, áleýmettik jobalar arqyly oqýshy boıyna bilim men tárbıeniń negizi qatar sińirilip jatqanyn jetkizdi.

Qamqorshylyq keńeste óz tarapynan atqarylýǵa tıisti isterdiń eńserilip jatqanyn jınalysqa kelgen ata-analar estip bildi. Jınalys sońynda urpaq tárbıesi jolyndaǵy ońtaıly usynystar men oramdy oılar aıtylyp, aldaǵy ýaqytta osy baǵytta birlese jumys atqarý josparlandy.