Qalamyzdaǵy ortalyq kitaphanada Elbasynyń «Bolashaqqa baǵdar: Rýhanı jańǵyrý» baǵdarlamalyq maqalasy aıasynda «Súıikti qalammen birgemin» atty jobanyń tusaýkeser rásimi ótti.

Atalmysh jobanyń negizgi maqsaty jas urpaqty boıyna otansúıgishtik sezim qalyptastyrý , týǵan ólke tarıhyna degen qyzyǵýshylyqty oıatý, mádenı eskertkishterimiz týraly tolyǵyraq aqparat berý bolyp tabylady.

Basqosýǵa «Nur Otan»partıasy Semeı qalalyq fılıaly tóraǵasynyń birinshi orynbasary Zýlfıa Jamaltdınova arnaıy qatysyp, «Jas ólketanýshylar» klýbyna qabyldanǵan jas jetkinshekterdiń moıyndaryna kók baıraǵymyz tústes galstýktardy saltanatty túrde taqty.

Sonymen birge «Halyqtyq oı-sana» jazba aqyndar ortalyǵynyń músheleri ózderiniń júrekjardy óleńderin oqyp, «Tarıhı-mádenı oryndarǵa saıahat» dep atalatyn jaıaý júrginshiler ekskýrsıanyń ary qaraı jandanýy úshin bar kúshterin salatyndaryn ýáde etti.

Jıyn sońynda barlyǵy birigip eń birinshi ekskýrsıalaryn Uly Abaıdyń eskertkishine taǵzym etýden bastaǵandy jón kórdi.
Aıta ketý kerek, búgingi tańǵa deıin ortalyqtandyrylǵan kitaphana júıesi «Aǵylshyn tili anammen birge», «Sháı ishsen kóńiliń jáı», «Komıks kafe» syndy qyzyqty is-sharalardy uıymdastyryp, kóptegen úıirmelerdiń ashylýyna uıytqy bolyp otyr.