Erteń on eki aıdyń sultany bolǵan qasıetti Ramazan aıy bastalady. Quran Kárimniń alǵashqy aıattary túsken osynaý keshirim men qulshylyq aıy qarsańynda Qazaqstan musylmandary dinı basqarmasynyń Óskemen óńiri boıynsha ókil ımamy, oblystyq «Halıfa Altaı» meshitiniń bas ımamy Ermek qajy Muqataı brıfıń ótkizdi.

Bas ımamnyń aıtýynsha, ádettegideı Ramazan aıyna bir kún qalǵanda óńirdiń barlyq meshitterinde qas qaraıa taraýıh namazy oqylady.

– Aýyz bekitý jáne ashý ýaqyttary jergilikti jerdegi dinı ókildikter bekitken kestege sáıkes oryndalýy kerek. Óıtkeni elimizdiń aýmaǵy ulan-ǵaıyr bolǵandyqtan, Almaty men Batys Qazaqstannyń oraza kestesi bizdiń oblysqa kelmeıdi. Jalpy, oraza – bir aı boıy iship-jeýden ǵana emes, ótirik-ósek aıtýdan, bireýdi syrttaı ǵaıbattaýdan, adamgershilikke jatpaıtyn ádet-qylyqtardan boıdy aryltý. Oraza – bálıǵat jasyna jetken, aqyl-esi túzý, syrqat emes adamdarǵa paryz. Al densaýlyǵynda kináraty bar jandarǵa Jaratýshy ıemiz keshirimmen qaraıdy, — dep túsindirgen Ermek qajy Muqataı bıylǵy Ramazan aıynda atqarylatyn ıgilikti ister týraly da aıtyp ótti.

Onyń aıtýynsha, oraza kezinde bir aıy boıy «Imam taksı» jobasy qolǵa alynady. Joba aıasynda dinı qyzmetkerler jamaǵatqa tegin qyzmet kórsetedi. Bul taksıler aýyzashardan soń oqylatyn taraýıh namazyna keletin adamdardy aqysyz tasymaldaıtyn bolady. Óıtkeni túnge qaraı qoǵamdyq kólikter toqtap qalatyndyqtan qalanyń ár shetinde turatyn adamdarǵa meshitke kelý qıyndyq týǵyzady. Osy jaıtty eskergen ımamdar qasıetti Ramazan aıynda adamdardyń alańsyz qulshylyq jasaýyna múmkindik týǵyzý úshin atalmysh jobany qaıta jandandyrmaq.