Jylda Semeı shaharynda eń sulý, eń aqyldy arýlardy anyqtaý maqsatynda kóptegen sulýlyq baıqaýlary ótkiziledi. Bıylda bul úrdis jalǵasyn taýyp, shaharymyzdaǵy qalalyq mádenıet saraıynda «Qazaqstan Stýdentter Alánsy» RSQ-nyń uıymdastyrýymen kópshilik asyǵa kútken «Semeı Arýy -2018» baıqaýy ótti. Syrtqy sulýlyq pen ishki ádemiliktiń úılesimdiligi qatar synalatyn bul dodaǵa qalamyzdaǵy joǵarǵy jáne orta arnaýly bilim mekemelerinen  bes boıjetken qatysyp, bar ónerlerin ortaǵa saldy.

Saıys jalpy tórt kezeńdi qamtydy. Birinshi aınalymda ózderin vıdeo nemese shaǵyn sahnalanǵan kórinis arqyly tanystyrsa, ekinshi bólimde kópten beri daıyndap júrgen erekshe ónerlerin dúıim jurtqa pash etti. Odan ári ár úmitkerge elimizdiń tarıhy men ádebıetine qatysty jáne qazaq halqynyń salt-dástúri, ádet-ǵurypyna baılanysty bir suraqtan qoıyldy. Al barlyǵyn qorytyndylaıtyn ádemi keshtiń eń sońǵy sheshýshi kezeńinde ulttyq naqyshtaǵy kıimderimizdi kıip, sán úlgisin kórsetti.

«Búginginiń Áıgerimi biz bolamyz» dep óleń shýmaqtarymen ózin tanystyrǵan Áıgerim Tóleýǵalıevanyń tyńǵylyqty daıyndyqpen kelgeni birden kórinip-aq turdy.

Defıle bóliminde kózdiń jaýyn alǵan keshki kóılekter sahnanyń kórkin odan ary ajarlandyra tústi.

Sondaı-aq, Jaqıa Sháıjúnisov atyndaǵy elektrondy kolejdiń namysyn qorǵaǵan Yrysbala Muratova bolsa, «Tango» bıin bılep qana qoımaı, kishigirim shoý jasaǵany jınalǵan qaýymdy tańqaldyrdy.

Sonymen baıqaýdyń qorytyndysy boıynsha, barlyq qyzdardan oq boıy ozǵan M.O. Áýezov atyndaǵy pedagogıkalyq kolejiniń atynan shyqqan Áıgerim Bolatqyzy jeńis tuǵyrynyń eń bıik satysyna kóterilip, «Semeı Arýy-2018» degen ataqqa laıyq dep tanyldy.