Qalamyzdaǵy Semeı memlekettik medısına ýnıversıtetinde «Salaýat» debat klýbynyń tikeleı bastamasymen «Rýhanı Jańǵyrý» baǵdarlamasy aıasynda Astana qalasynyń 20 jyldyǵyna oraı «CINEMA CUP II» ashyq aımaqtyq pikir-saıys týrnıri ótti. Tartysqa toly dodaǵa jalpy sany 20-ǵa jýyq fraksıa qatysyp, óz aralarynda kil myqtylardy anyqtady.

Týrnırdiń irikteý raýndtary Brıtandyq Parlamenttik formatynda (BPF) ótse, fınaldyq oıyndar Amerıkalyq Parlamenttik formatynda (APF) oınatyldy. Bul pikir-saıys dodasynyń ózge týrnırlerden ereksheligi — taqyryptardyń barlyǵy kınodaǵy qyzyqty oqıǵalar jelisinen quralǵan.

Jarysty qyzyqty ótkizý maqsatynda uıymdastyrýshylar 1 apta buryn «Vkontakte» áleýmettik jelisinde «CINEMA CUP II» degen ataýmen arnaıy top ashyp, týrnırde oınatylatyn 9 fılmniń tolyq nusqasyn júktep, qysqasha aqparattarmen bólisip otyrǵan bolatyn.

Árbir raýndta sózdi birde salqyndatyp, birde ottaı jalyndatyp, tapqyrlyqpen sóz sýretin salǵan pikirsaıysshylar kóptegen qyzyqty qararlardy ortaǵa salyp, fılmniń basty keıipkerlerleriniń obrazyna tolyqqandy kire aldy.

Sonymen kópten kútken jeńimpazdar tizimine kóz júgirtetin bolsaq, «Salaýat» pikir-saıys ordasynyń namysyn qorǵaǵan «Rosharh» fraksıasy : Nurbaqyt Isahan men Nuraı Masalım jeńis tuǵyrynyń eń bıik satysyna kóterilip, kýbokty qanjyǵalaryna baılady. Al, oınaý stılderimen erekshelengen qalamyzdaǵy «Kongres» ıntellektýaldy debat klýbynyń «Ogst Lúmer» fraksıasy men osy klýbtyń jas býyndary Mırat Rústemuly men Nargız Aımýhametova júldegerler qatarynan kórindi. Sondaı-aq, tórt raýndtyń kórsetkishi boıynsha eń joǵary upaı jınaǵan 8 spıker arasynda Lınkoln-Dýglas (LD) formatynda úzdik óner kórsetken Danıar Beısembekov bolsa «Eń úzdik spıker» nomınasıasyn jeńip aldy.