Oblystyq «ALTAI» telearnasynyń 60-jyldyǵyn atap ótý qarsańynda óńirdegi buqaralyq aqparat quraldary arasynda peıntbol, sadaq atý jáne straıkbol avtomatynan nysanaǵa atý boıynsha dostyq týrnıry ótti.

Bıyl aıtýly sharany atap ótýde alty komanda jarys jolyna shyqty. Olar:«Shyǵys aqparat» JSHS, S.Amanjolov atyndaǵy SHQMÝ, «ALTAI» arnasynan eki komanda, «Vestnık Kazsınka» gazeti, sondaı-aq baspasóz hatshylarynan quralǵan komanda.

Aıta ketý kerek, ««ALTAI»» telearnasy sporttyq saıysty oblystyq dene shynyqtyrý jáne sport basqarmasymen birlese otyryp uıymdastyrdy. Jarys tóreshileri eń aldymen jerebe tartyp, qarsylastardy anyqtady. Qatysýshylar joǵaryda atap ótkendeı, alǵash bolyp kedergilerden júgirip ótip, straıkbol avtomatynan nysanaǵa tıgizdi. Odan keıin peıntboldan baqtaryn synap, artynsha sadaq atýmen saıysty qorytyndylady. Dostyq týrnıry bolǵanymen, barlyq komanda jeńis úshin baryn salyp, qyzý básekege tústi. Úsh kezeńnen quralǵan jarys qorytyndysynda S.Amanjolov atyndaǵy SHQMÝ quramasy top jardy. Baspasóz hatshylary júldeli ekinshi oryndy ıelense, «Vestnık Kazsınka» gazeti úshinshi orynnan kórindi. Jeńimpaz ben júldegerlerdi marapattaý rásimine ««ALTAI»» telearnasynyń dırektory Aıda Jabaǵıeva qatysty.

– Barlyqtaryńyz bir kisideı at salysyp, arnamyzdyń 60-jyldyǵyn atap ótýge jınalǵandaryńyzǵa alǵys bildirgim keledi. Dostyq jarysymyz óte qyzyqty ótti degen oıdamyn. Qazirgi «Altaı» burynǵy «Qazaqstan-Óskemen» telearnasy únemi bilikti mamandar daıarlap keledi. Birqatar túlekterimiz respýblıkalyq deńgeıdegi arnalarda qyzmette. Munyń bári, árıne, sizderdiń de qoldaýlaryńyz dep bilemin, – dedi Aıda Jabaǵıeva.