Óskemendegi Ortalyq mádenıet úıinde 12-13 mamyr kúnderi múmkindigi shekteýli jandardan qurylǵan bı ujymdary arasynda VII respýblıkalyq baıqaý bolyp ótti. Oǵan Astana, Almaty, Qostanaı, Qaraǵandy, Taraz, taǵy da basqa elimizdiń 12 óńiriniń talantty bıshileri qatysyp, bı óneriniń qudireti arqyly qalyń kórermenniń qoshemetine bólendi.

Sharany uıymdastyrýshy múgedekter uıymynyń basshysy Elena Anatolevna Baýstyń aıtýynsha, baıqaýdyń alǵashqy kúninde elimizdiń túkpir-túkpirinen jınalǵan 120 ónerpaz sıqyrly da syrly bı ónerindegi talanttaryn ortaǵa salyp, «Halyqtyq bı» jáne «Zamanaýı bı» atalymdary boıynsha synǵa tústi.

Baıqaý nátıjesinde qazylar alqasynyń sheshimimen joǵary kásibı sheberligi úshin aqtóbelik «Jalyn», óskemendik «Mechta» bı ansámblderi 1-oryn, mádenıet pen ónerdiń ordasy – Almaty qalasynan kelgen «Órleý» toby men semeılik «Bıshi arýlar» toby -2 oryn, taldyqorǵandyq «Jetisý» men qaraǵandylyq «Merýert» án-bı ansámblderi júldeli 3 orynǵa ıe boldy.

Al «Kóktem» bıimen kórermenderdi ózine baýrap alǵan qostanaılyq «Tomırıs» toby Bas júldege ıe bolyp, respýblıkalyq baıqaýdyń jeńimpazy atandy. Barlyq júldegerler men jeńimpaz komanda arnaıy Kýbok, Dıplomdarmen jáne qarjylaı syılyqtarmen marapattaldy.

Shara uıymdastyrýshylary ónerpazdardy kólikpen, tamaqtandyrýmen jáne qarjylaı qol ushyn bergen «Kazsınk» JSHS, «Pıssa blúz», «Baqyrshyq ken-baıytý kásiporny», oblystyq mádenıet jáne muraǵattar basqarmasy, «Nur isker» JSHS, «Nur Otan» partıasy fılıaly, «Shyǵys tańy» JSHS syndy demeýshilerine alǵys aıtty.