Elbasy Nursultan Nazarbaevtyń "Bolashaqqa baǵdar: Rýhanı jańǵyrý" maqalasynda qazaq tili grafıkasyn latyn álipbıine aýystyrý tapsyrmasy basym baǵyt bolǵany belgili.
"Qazaq jazýyn latyn álipbıine kóshirý: jahandaný jaǵdaıyndaǵy memlekettik tildiń damýy" taqyrybynda ótken halyqaralyq ǵylymı-tájirıbelik konferensıaǵa Qyrǵyzstan, Ózbekstan, Túrkıa, Ázerbaıjan, Reseı elderinen kelgen ǵalymdar, oqytýshylar men stýdentter qatysty.
H.Dosmuhamedov atyndaǵy Atyraý memlekettik ýnıversıteti Atyraý oblystyq ákimdigimen birlesip uıymdastyrǵan sharanyń maqsaty- qazaq jazýyn latyn álipbıine kóshirý máselesin talqylaý, jahandaný men sıfrlandyrý jaǵdaıynda memlekettik tildi damytý.
QR Mádenıet jáne sport mınıstrligi Tilderdi damytý jáne qoǵamdyq-saıası jumystar komıtetiniń tóraǵasy Qýat Borash atqarylyp jatqan sharalar jaıynda baıandama jasady.
-Latyn grafıkasyna negizdelgen qazaq álipbıi jasaldy. Endi 2025 jylǵa deıin kezeń kezeńmen kóshý josparlanyp otyr. Maýsym aıynyń sońynda alfavıttiń tujyrymdamasyn bekitip, qyrkúıekte Ulttyq komısıaǵa usynamyz. Sodan keıin latyn qarpine oqý-ádistemelik jaǵynan kóshý bastalady-dedi Qýat Borash.
Konferensıaǵa qatysqan Atyraý oblysynyń ákimi Nurlan Noǵaev fılologtar men til mamandarynyń aldaǵy jumystaryna tabys tiledi.
-Latyn qarpine kóshý árqaısymyz úshin mańyzdy, bul tarıhı oqıǵa. Búgingi shara ǵalymdardyń pikir almasýlaryna, osy taqyryp boıynsha teorıalyq, tájirıbelik máselelerdi sheshýge baǵyttalǵan. Latyn álipbıine kóshý memlekettik tilimizge de oń yqpal etedi, qazaq tiliniń damýyna septigin tıgizedi, ony zamanaýı ǵylym men tehnıkanyń tiline aınaldyrady. Konferensıada talqylanǵan mańyzdy máseleler boıynsha qabyldanǵan sheshimder tıimdi bolaryna senim bildiremin, -dep atap ótti Nurlan Noǵaev.
