Oblys ákimi Danıal Ahmetovtiń ókimimen Kókpekti aýdany ákimi qyzmetine Asqat Saıdahmetuly Smaılov taǵaıyndaldy. Ol buǵan deıin Tarbaǵataı aýdany ákiminiń orynbasary qyzmetin atqarǵan.

Jańa basshyny aýdan aktıvine oblys ákiminiń orynbasary Shalqar Baıbekov tanystyrdy.

Asqat Saıdahmetuly 1968 jyly 1 naýryzda Semeı oblysy Aqsýat aýdany Qyzyl Kesik aýylynda dúnıege kelgen.
1991 jyly Qaraǵandy memlekettik ýnıversıtetin «ekonomıs» mamandyǵy boıynsha bitirdi.

Eńbek jolyn 1994 jyly Aqsýat aýdandyq qarjy bóliminiń kirister túsýin boljaý jáne ekonomıkalyq taldaý bóliminiń aǵa ekonomısinen bastaǵan. Keıin Tarbaǵataı aýdandyq qarjy bólimi meńgerýshisiniń orynbasary, búdjet bóliminiń bastyǵy qyzmetterin atqardy.

2002-2005 jyldar aralyǵynda Tarbaǵataı aýdandyq ekonomıka bóliminiń, keıin aýdan ákimi apparatynyń qarjy-sharýashylyq bóliminiń bastyǵy boldy. Eki jyl Tarbaǵataı aýdandyq ekonomıka jáne búdjettik josparlaý bóliminiń bastyǵy laýazymynda qyzmet etti.

2009 jyldyń jeltoqsanynda Kókjyra aýyldyq okrýginiń ákimi mindetine taǵaıyndaldy. Sońǵy 8 jylda Tarbaǵataı aýdany ákiminiń orynbasary qyzmetin atqarǵan.

Osydan bir aı buryn burynǵy ákim Ramıl Saǵandyqov SHQO veterınarıa basqarmasynyń basshysy bolyp taǵaıyndalýyna baılanysty aýdan ákiminiń orny bos turǵan bolatyn.