Astana qalasy ákimdigi «1000 saýda orny» baǵdarlamasyn iske qosqan bolatyn. Endi osy baǵdarlamanyń tájirıbesin Óskemen ákimdigi de qoldanyp kórýdi josparlap otyr. Bul týraly qala ákimdiginiń baspasóz qyzmeti málim etti.

Qazir qalada zańsyz kóshe saýdasymen aınalysyp turǵan dúńgirshekter men pavılondar alynyp tastalýda.

-Óskemendik kásipkerlerge 20 pavılon usynylady. Al onda saýda júrgizý quqyǵyn aýksıon arqyly utyp alýǵa bolady, — dep habarlaıdy baspasóz qyzmeti.

Atalmysh baǵdarlamanyń tıimdiligi nede? Ol — shaǵyn bızneske demeý retinde usynylǵan baǵdarlama. Kóshedegi saýdany uıymdastyrý úshin oryn tapshylyǵyna qatysty máseleni sheshý maqsatynda paıda bolǵan dese de bolady.

Osy baǵdarlamanyń aıasynda kásipkerlerge kóshedegi saýda úshin 1000 oryn usynylyp, oǵan bólingen jer ýchaskesi birden 7 jylǵa jalǵa beriledi eken. Sondaı-aq, bul oryndar naqty jerlerde belgilenedi jáne saýda qyzmetiniń túri, oryndar sany men nysannyń mekenjaıy kórsetiledi. Osy oraıda eskerilgen taǵy bir mańyzdy máselelerdiń biri — barlyq saýda núkteleri sanıtarlyq jáne órtke qarsy talaptarǵa saı bolady ári qalanyń kelbetin de buzbaıdy.

Aıta ketsek, kóshe saýdasynyń bekitilgen túrlerine jyljymaly asqanalar, kofehanalar, nan-toqash, balmuzdaq, gazet, jemister men kókónister satýǵa arnalǵan oryndar, kádesyılar men gúl satý dúńgirshekteri jatady.