Barlyǵymyz biletindeı ár demalys saıyn Semeı shaharaynda birqatar aýyldyq eldi mekender qala turǵyndaryna esh qospasyz aýyldyń tabıǵı taǵamdaryn halyqqa qoljetimdi baǵada usyný maqsatynda kóptegen jármeńkeler uıymdastyrylyp keledi.

Osyndaı jaqsy úrdis keshe de jalǵasyn taýyp «Severnyı» saýda logıstıkalyq ortalyǵynda Abyraly, Jazyq, Prırechnyı jáne taǵy da basqa aýyldyq okrýgterdiń qatysýymen aýylsharýashylyq ónimderiniń jármeńkesi ótti. Semeı óńirine qarasty 16 aýyldyq okrýginen jetkizilgen qymyz, et, sút ónimderi tómen baǵada saýdalandy. Tańerteńnen jármeńkege asyqqan adamdardyń qarasy qalyń boldy. Halyqqa usynylǵan azyq-túliktiń baǵasy da bazardaǵydan birshama arzan bolǵandyqtan, barlyq ákelingen tamaqtar jarty saǵat ótpeı jatyp tez arada satylyp ketti. Máselen, tańerteń erte kelgen Semeı jurtshylyǵy qoı etiniń 1 kelisin 1300-den, sıyr etin 1400, al jylqynykyn 1500 teńgeden satyp alý múmkindigine ıe boldy.

— Biz jyl saıyn osyndaı jármeńke ár jeksenbi jáne senbi kúnderi ótetinin tańystarymyzdan jıi estıtinbiz. Al, búgin kúıeýimiz ekeýmiz arzan baǵada et satyp alý úshin keldik. Barlyq taǵamdardyń baǵasy óte jaqsy, qarapaıym turǵyndarǵa qoljetimdi dep oılaımyn. Egerde kelesi joly taǵy da aýyldyq okrýgterdiń jármeńkesi ótkiziletin bolsa, mindetti túrde keletin bolyp sheshtik, — deıdi qala turǵyny Raıhan Aıtqojına.