Adamzat tarıhyndaǵy eń aýyr qantógis soǵystyń aıaqtalǵanyna 73 jyl ótipti. El úshin qoldaryna qarý alyp, maıdannyń aldyńǵy shebinde qanquıly jaýmen shaıqasqan dana qarıalarymyz kúnnen-kúnge azaıyp barady.

Soǵys alańynda jaýmen jaǵa jyrtysqan jaýynger ardagerlerimizdi umytpaı, olardyń erlikterin joǵary baǵalaǵanda ǵana ulttyq rýhymyz asqaqtaı túsetini sózsiz. Jylda Jeńis kúni qarsańynda óńir basshylary atalarymyz ben apalarymyzdy quttyqtap, qomaqty qarajat sommasy men syılyqtaryn usynyp jatady. Bıyl da bul úrdis jalǵasyn taýyp, qala ákimi Ermak Sálimov pen birqatar laýazymdy tulǵalar qalamyzdaǵy tórt ardagerdi Jeńis merekesimen quttyqtap, , árqaısysyna 500 myń teńgeniń sertıfıkatyn tabys etti.

100-shi atqyshtar dıvızıasynyń jaýyngeri bolǵan, búginde 95 jasqa aıaq basyp otyrǵan Atambaı Orazbaev, 14 jasynan bastap áskerı gospıtálde maıdanda zardap shekkenderge medısınalyq kómek kórsetken Ekaterına Krasnánskaıa, 8-shi synyp bitire salysymen elin qorǵaýǵa attanǵan Abdrashıt Ishmýhametov, soǵys kezinde eki ret jaraqat alsa da, ójettik pen batyrlyqtyń úlgisin kórsetken Aleksandr Atavın surapyl kezeńdegi estelikterimen bólisip, barsha quttyqtap kelgen azamattarǵa ózderiniń rızashylyqtaryn bildirdi.