Bıyl Semeıdiń Túıemoınaq araly, Bobrovka saıajaıy, Shyǵys jáne Mırnyı kentterindegi halyq sý tasqyny saldarynan aıtarlyqtaı úlken zardap shekti. Osyǵan baılanysty búgingi kúnde úıleri jaramsyz kúıge túsip, qabyrǵasy qaıysqan turǵyndarǵa materıaldyq jáne qarjylyq kómek kórsetýshilerdiń sany kúnnen-kúnge artýda. Tipti, Qazaqstannyń ózge aımaqtary da belsendilik tanytyp, poezd arqyly bolsa da baspanasyz qalǵan azamattarǵa qajet zattardy kóptep jiberýde.

Al búgin «Tarbaǵataı eli sizdermen birge» dep jazylǵan avtobýsqa tıelgen makaron, un, kúrish jáne de taǵy da basqa azyq-túlik ónimderi Tarbaǵataı aýdanynan kelip jetti. Qıyn jaǵdaıdy bastan ótkerip otyrǵan adamdar úshin arnalǵan gýmanıtarlyq kómek «Nur Otan» partıasy Semeı qalalyq fılıalynyń shtabyndaǵy qoımaǵa ornalastyryldy.

Tarbaǵataı aýdany Aıagóz halqyna da qol ushyn sozyp, 2 mln teńge kóleminde zattarmen jáne azyq-túlikpen kómek kórsetken bolatyn.

— Igilikti istiń bastamashysy bolǵan Semeı qalasynyń qaıyrymdy jandaryna, Almaty shahary men Qyzylorda oblystyq jastar resýrstyq ortalyǵyna zor alǵysymdy bildiremin. Qazirgi tańda bizdiń qoımada turǵan azyq-túlik,kıim-keshek syndy zattar aldaǵy ýaqytta arnaıy qurylǵan komısıa músheleri arqyly kópshilikke teńdeı bólip, tez arada taratyp beretin bolamyz, — deıdi «Nur Otan»partıasy Semeı qalalyq fılıaly tóraǵasynyń birinshi orynbasary Zýlfıa Jamaltdınova.