Oblys ákimi Danıal Ahmetov Glýbokoe aýdanyndaǵy sý tasqynynyń saldaryn joıý jumystaryna jumyldyrylǵan qurylys kompanıalary basshylarynyń basyn qosyp, olarǵa atqaryp jatqan sharýalary úshin alǵys bildirdi.

Aımaq basshysynyń tóraǵalyǵymen ótken jıynda tabıǵı apattyń saldaryn joıý jumystarynyń keı qorytyndylary shyǵarylyp, birqatar mindet júkteldi. Atap aıtqanda, oblys ákimi aýdan basshylyǵyna mamyr aıynyń ortasyna deıin aýdandaǵy satylyp alynýy tıis úılerge qatysty qujattar daıyn bolýy kerektigin aıtyp, tapsyrma berdi.

– Tekserý jumystary 10 úıdiń jóndeýge kelmeıtinin anyqtaǵan. Endi sol úılerdiń turǵyndaryn qonystandyratyn basqa baspanalar tabý qajet. Aýdan basshylyǵy qajetti úılerdi taýyp ta qoıypty. Tek qujattaryn resimdeý jaǵynda biraz kidiris bar eken. Sol jumysty tezdetip tyndyrý kerek, – degen oblys ákiminiń sózine aýdan basshysy qujattar daıyn ekenin aıtyp, endi sol 10 úıdi satyp alýǵa múmkindik beretin qarajattyń túspeı jatqanyn jetkizdi.

Aýdan ákimi Qalıqan Baıǵonysovtyń aıtýynsha, bul maqsatqa 39,7 mıllıon teńge bólinýi tıis-tin. Óz kezeginde oblys ákimi eger aǵymdaǵy aıdyń ortasyna deıin qajetti qarajat túspese, atalǵan jumys oblystyq búdjetten qarjylandyrylatynyn jetkizdi. Jıynda sý tasqynynan búlingen úılerdi qalpyna keltirý jumystary da negizinen oblystyq qazyna esebinen júrgizilip jatqany da belgili boldy.

– Oblystaǵy bıylǵy tasqynnyń saldaryn joıý jumystaryna Úkimetten 1 mıllıard 200 mıllıon teńge kóleminde kómek kórsetilýi tıis bolatyn. Degenmen, búginge deıin tyndyrylǵan sharýanyń deni «Paryz» qory men oblystyq búdjetten bólingen qarajattyń esebinen qarjylandyrylǵanyn aıtqym keledi. Osy rette, óz atymnan qyzyl sýdan zardap shekken turǵyndardyń úılerin qalpyna keltirý jumystaryna kún-tún demeı atsalysyp keletin qurylys kompanıalary basshylaryna olardyń shyǵyndary mindetti túrde óteletinine ýáde beremin. Sizderdiń eńbekterińiz esh bolmaıdy, – degen oblys ákimi búginge deıin atqarylǵan jumysqa kóńili tolatynyn jetkizdi.

Aıta keteıik, búginde aýdandaǵy Altaı, Progres, Predgornoe aýyldary men Beloýsovka kentindegi apat saldaryn joıý jumystaryna 12 merdiger kompanıa jumyldyrylǵan. Olar negizinen sý basqan úılerdi qalpyna keltirý mindetterin óz moıyndaryna alǵan. Esterińizge salaıyq, naýryz aıynyń sońynda bolǵan tabıǵı apat kesirinen 150-den astam úı sý astynda qalyp, 197 otbasy qaýipsiz jerge kóshirilgen-di. Sońǵy esep boıynsha tasqynnan keltirilgen shyǵyn mólsheri 187 mıllıon teńgege baǵalanyp otyr.