Óskeleń urpaqtyń boıyna baýyrmaldyq pen adamgershilikti, otansúıgishtik pen aýyzbirshilikti sińirý men úıretýde áskerı sharalardyń mańyzy erekshe. Semeı qalasyndaǵy fızıka – matematıka baǵytyndaǵy Nazarbaev Zıatkerlik mektebiniń dene tárbıesi jáne estetıka ádistemelik birlestiginiń kúntizbelik josparyna sáıkes qalalyq áskerı estafeta ótti.

Elimizdegi 1 mamyr – Qazaqstan halyqtary birligi kúni men 7 mamyr — Otan qorǵaýshylar kúnine arnalǵan sharaǵa Zıatkerlik mekteptiń eki komandasynan bólek №21, 26, 34 bilim mekemeleri, «Batyr» áskerı – patrıottyq klýbynyń tárbıelenýshileri qatysty.

Áskerı estafetaǵa qalamyzdaǵy alǵashqy áskerı daıyndyq ortalyǵynyń bastyǵy, maıor Beken Úkibasov pen tájik –aýǵan shekarasyndaǵy qaqtyǵystardyń ardageri Esenǵalı Orazbaev arnaıy kelip, tórelik etti .

Komanda quramy 6 oqýshydan bekitilip, oǵan 3 er, 3 qyz baladan alyndy. Saıys negizinen jer baýyrlap júrý, Kalashnıkov avtomatyn jartylaı shashyp-jınaý, avtomat magazınin oqqa toltyryp, buzý, pnevmatıkalyq myltyqtan oq atý syndy kedergilerge toly 6 kezeńnen turdy.

Jarys qorytyndysy boıynsha ózgelerden oq boıy ozyp shyqqan Semeı qalasyndaǵy fızıka –matematıka baǵytyndaǵy Nazarbaev Zıatkerlik mektebiniń komandasy birinshi oryndy ıelenip, kýbokty qanjyǵalaryna baılady. Sondaı-aq, júldeli 2 – shi oryn №26 orta mektebine buıyrsa, al 3-shi oryn №34 orta mekteptiń komandasy laıyq dep tanyldy.