QR Memlekettik hatshysy G.N.Ábdiqalyqova Nazarbaev Ýnıversıteti uıymdastyrǵan «Serpindi tehnologıalar dáýirindegi joǵary bilim ınovasıasy» atty Joǵary bilim berý kóshbasshylarynyń 7-shi Eýrazıalyq forýmynyń ashylý rásimine qatysty.
Atalǵan forým 2011 jyldan beri ótkizilip keledi, onyń maqsaty – tehnologıalyq jáne áleýmettik ózgerister turǵysynan bilim sektoryn talqylaý.
Forým jumysyna ulttyq jáne álemdik sarapshylar, ǵylymı qyzmetkerler, memorgandardyń, jumys berýshilerdiń, bilim salasyndaǵy qoǵamdyq birlestikterdiń ókilderi, t.b. – álemniń 15 elinen (AQSH, Reseı, Qytaı, Ulybrıtanıa, Koreıa Respýblıkasy, Avstralıa jáne t.b.) 150-den astam adam qatysty.
Gúlshara Ábdiqalyqova óz quttyqtaý sózinde Forým Qazaqstannyń sımvoly – Astananyń 20 jyldyq mereıtoıy belesinde ótkizilip otyrǵanyna toqtaldy.
Memlekettik hatshy bilim berý júıesiniń jan-jaqty damýyna el Prezıdenti N.Nazarbaev basa kóńil bóletinin aıta kelip, onyń: «Men árdaıym sizderdiń bilim alýlaryńyz ben damýlaryńyz úshin qajetti barlyq jaǵdaıdy jasaýǵa tyrysyp kelemin. Álemdik deńgeıdegi ýnıversıtet, zıatkerlik mektepterin ashtym, «Bolashaq» baǵdarlamasyn bekittim» degen sózin atap ótti.
Nazarbaev Ýnıversıteti elimizdiń mańyzdy ulttyq jobasy bolyp tabylady. Ol ashylǵannan beri (2010 j.) oqý orny qabyrǵasynan 2 myńdaı maman túlep ushty. Ýnıversıtet sonymen qatar bıohımıalyq jáne ıadrolyq ınjenerıa, robototehnıka, mehatronıka jáne t.b. sırek baǵyttaǵy kadrlardy daıarlaıdy. Joǵary oqý ornynda álemniń túpkir-túpkirinen kelgen úzdik oqytýshylar jumys isteıdi, ol eń zamanaýı materıaldyq-tehnıkalyq quraldarmen jáne zerthanalarmen jabdyqtalǵan.
Búginde Nazarbaev Ýnıversıteti jahandyq deńgeıdegi ǵylymı-bilim berý ortalyǵyna aınaldy jáne Azıanyń Qytaı, Japonıa, Koreıa Respýblıkasy, Sıngapýr jáne t.b. tárizdi 14 jetekshi ýnıversıteti qataryna qosyldy.
– Joǵary oqý oryndary keleshekte eńbek naryǵynda básekege tótep bere alatyn, bilimniń úzdik baǵdarlamalary boıynsha oqytylǵan jańa formattaǵy mamandardy daıarlaýǵa tıis, – dedi Memhatshy.
Forým sońynda QR Memlekettik hatshysy G.N.Ábdiqalyqova qatysýshylardyń báriniń syndarly suhbat quryp, tabysty jumys júrgizýlerine tilektestigin bildirdi.
