Qyrǵyzstan men Tájikstan eki el shekaralary arasyndaǵy daýly aımaqty bólý týraly kelissózdi taıaý ýaqytta bastaıdy. Qyrǵyzstan prezıdenti baspasóz qyzmetiniń habarlaýynsha, bul týraly Qytaıdyń Sındao qalasynda ótken Shanhaı yntymaqtastyq uıymy (SHYU) samıti barysynda Tájikstan jáne Qyrǵyzstan prezıdentteri Sooronbaı Jeenbekov pen Emomalı Rahmon arasyndaǵy ekijaqty kezdesýde belgili boldy. Kezdesýde negizinen eki eldiń yntymaqtastyǵy men aımaqtyq qaýipsizdik máseleleri kóterilgen. Sonymen birge eki el prezıdentteri qyrǵyz-tájik shekarasyn delımıtasıalaý men demarkasıalaýdy tezdetý kerek dep sheshken. Shekara máselesine qatysty premer-mınıstr orynbasarlary deńgeıindegi kezdesý 20 maýsymda Dýshanbede ótedi.

Qyrǵyzstan men Tájikstan shekarasyndaǵy daýly aımaq janjalǵa jıi sebep bolady. 4 maýsymda shekaranyń kelisilmegen ýchaskesinde eki el shekarashylary janjaldasyp qalyp, áýege oq atylǵan. Janjal kezinde qyrǵyz shekarashylary Tájikstannyń úsh sarbazyn ustaǵan. Biraq sol kúni olardy bosatqan.

Osy oqıǵadan keıin eki eldiń bas shekarashylary Tájikstan aýmaǵynda kezdesip, janjal týǵan jaǵdaıda eki tarap ta qarý qoldanbaý týraly sheshimge kelgen.